Minister Eman NO a duna Minister Dowers e 10 miyon florin   

ORANJESTAD -- Parlamento di Aruba tabata e scenario di tratamento di presupuesto den ultimo simannan, y tambe di esun di husticia y finansas. Lider di MEP a trata di tur forma pa haya sa si gobierno lo cumpli cu e palabracion hasi pa duna 10 miyon florin na minister Dowers pa e por combati criminalidad.
“Nos tur ta sinti e inseguridad grandisimo na Aruba, pero minister Dowers ta sigi insisti cu e no ta sinti cu tin un problema. Pa Minister Dowers ta "business as usual". Minister Dowers a yega di bisa cu e no por combati criminalidad, pasobra e no ta haya suficiente fondo. Pesey mi a puntre na mas di un occasion si awor si el'a haya suficiente fondo pa por combati criminalidad. Pasobra di e analisis di e presupuesto cu nos a hasi y a publica, ta resulta cu ta solamente 5.2 miyon florin extra minister Dowers su departamentonan a haya, y cu 5.2 miyon florin bo no por combati criminalidad na e escala cu nos conose na Aruba awor.
Minister Dowers a confirma cu e NO a ricibi e 10 miyon florin cu a keda combini cu Mike Eman despues di e manifestacion di Comision Pro Seguridad.
Tambe Minister Dowers a indica cu no ta su so por bringa criminalidad. E mester di cooperacion di minister Sievinger cu no ta hasi un bon screening di personanan cu ta drenta nos pais. Tambe e minister di turismo cu segun minister Dowers ta trese turistanan problematico Aruba. E mester tambe di cooperacion di minister Paul Croes cu segun e no ta hasi suficiente pa soluciona problemanan social den nos pais. Y finalmente minister Hooijboer cu lo no ta hasi suficiente pa tene hobennan na scol, y ora nan drop out nan por cai mas facil den mal caminda.
Pesey mi a puntra e minister si awor si e ta hayando e cooperacion cu e tin mester, si algo a cambia den esaki. Minister a indica cu no mucho a cambia.
Mi a haya e impresion cu e gobierno aki no ta realisa ainda con grandi e problema di criminalidad ta. Mi ta haya un falta di vision y liderasgo. Mi ta haya un falta di convivencia cu comunidad. Mi ta haya un falta di e atencion cu un gobierno mester duna na su pueblo.

SOLUCION DI MEP
Manera cos ta mustra, e gobierno aki no tin ni e interes, ni e vision con pa ataca e problema di criminalidad.
Den e vision di partido Movimiento Electoral di Pueblo, nos lo cuminsa cu pone un control estricto na nos fronteranan pa nos sa exactamente ken y kiko ta drenta nos pais. Warda nos Costa lo haya autoridad bek, y material y personal pa por controla y protehe nos costanan. E radar lo wordo instala bek, y Aruba lo haya su propio helicopter un biaha mas.
Una bes nos tin control di nos costanan, nos lo pone orden paden den cas, bahando cu man duro contra criminalidad, corupcion y tur locual ta ilegalidad. Nos lo duna Cuerpo Policial e respet bek pa nan por trese orden y respet bek den nos comunidad.
Ta di e forma aki so nos por logra trese trankilidad den nos comunidad” lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co