Qredits ta brinda micro financiamento pa entrepreneurnan hoben    

ORANJESTAD- Tabata un momento hopi importante ora Ministernan Eman y Arends diahuebs atardi a firma un acuerdo cu sr. Groeneveld, ehecutivo di e institucion Qredits cu ta brinda micro financiamento te 50 mil florin pa comerciantenan chikito cu kier start un negoshi, como tambe startups riba tereno di inovacion. Esaki ta haci posibel cu hendenan cu kier cuminsa cu un negoshi y no ta logra na banco lihe pa varios motibo, por acudi na Qredits cu ta ofrece e posibilidad di financiamento sin cu ta exigi un garantia manera banco si ta haci. Prome Minister Eman a bisa cu e problema cu entrepreneurnan hoben ta encontra hopi bes na momento cu nan bay un banco pa busca financiamento pa start cierto tipo di negoshi, ta cu banco no semper ta flexibel. Qredits ta haci e financiamento contra un interes di 8,75% posibel y esnan cu haci e prestamo ta wordo guia durante e proceso di yega na nan propio negoshi. Na mas di un ocasion a wordo enfatisa cu Qredits no ta un competencia pa banconan local, al contrario, e instituto ta bay traha hunto cu banconan na Aruba. Solamente e punto di salida di Qredits ta diferente cu banconan comercial. Qredits ta un fundacion non profit cu tin su oficinanan oficial na Hulanda desde 2009 y ya caba un filial na Boneiro y desde e prome kwartaal di otro aña tambe na Aruba.

Expresionnan haci den e articulo aki no necesariamente ta refleha opinion di ArenaPoliti.co