Qredits ta cuminsa otro aña na Aruba pa yuda hoben entreprenuers cu financiamento   

ORANJESTAD- Siman pasa Ministernan Eman y Arenda a firma un acuerdo cu institucion Qredits, un fundacion non profit cu tin como meta yuda entreprenuers y start ups cu kier cuminsa nan propio negoshi. E diferencia entre un banco comercial y Qredits ta cu contrario na un banco e fundacion no ta exigi un garantia y ta coach e entrepreneur nobo riba e caminda di exito. E financiamento cu Qredits ta ofrece ta te 50 mil florin contra un interes di 8,75%.

Prome Minister Eman a splica cu un di e comentarionan cu e ta haya hopi ta cu esnan cu kier start un negoshi no ta haya financiamento facil cerca un banco y esey ta pone cu tin bes nan mester busca financiamento na otro instancianan unda e interes ta menos faborabel. "Nos a tene cuenta cu e critica aki y a bay en busca di un solucion. Den nos buskeda nos a yega cerca Qredits y na varios momento, manera durante Europe Meets Americas nos a sinta hunto pa mira kico nos por haci pa soluciona e problema aki." Eman a remarca cu tempo cu e actual Minister Arends tabata consehero di Minister di Asuntonan Economico y di Minister President el a pusha duro pa realisa e proyecto aki. Sr. Groenevelt  di Qredits ta un otro persona cu tambe a pusha duro pa trece Qredits Aruba.

Minister President Eman "Reina Maxima ta na haltura di e desaroyonan rond di e proyecto aki. E ta un persona masha envolvi den asuntonan di micro financiamento pa negoshinan chikito. Un negoshi ta cuminsa chikito y ta crece bira loke nos conoce como negoshinan mediano. Qredits tambe a start chikito y awe e ta grandi na Hulanda cu un filial na Boneiro tambe. Qredits no solamente ta facilita financiamento pa negoshinan chikito, pero tambe ta bay scolnan secundario pa educa e hobennan con inicia un negoshi. Pa esaki Qredits a traha un curriculum. Algo cu nos kier bay introduci aki na scolnan na Aruba tambe. "

Eman ta satisfecho cu Qredits ta birando un realidad na Aruba. Qredits ta bay traha cu banconan comercial. E ta bira un sorto di loket cu ta regla cu e prome prestamo ta wordo facilita pa start cu negoshinan nobo y e acuerdo cera ta wordo concretisa cu un banco local. "Qredits ta un iniciativa di gobierno di Aruba cu sector priva. Nos ta contento cu banconan local tambe ta participa."

Expresionnan haci den e articulo aki no necesariamente ta refleha opinion di ArenaPoliti.co