Después di 8 anja nos mester constata cu Gobierno di AVP no a hasi net net nada pa nos Pueblo Piscador. Puro show puro promesa pero NO A CUMPLI cu nada.

For di tempo cu mi tawata Minister, nos a cuminsa construí piernan na diferente sitio cu nos piscadornan ta usa pa atende cu nan ofishi y boto. Hopi di e piernan aki a wordo manteni dor di e piscadornan pero awor ta momento PA RENOBA Y EXPANDE E PIERNAN Y FACILIDADNAN PA TUR PISCADOR AKI NA ARUBA.

Nos a demostra den pasado di a haci hopi pa nos piscadornan y awor nos ta bai caba e trabao aki.

Fuera di PIERNAN na TUR Centro pa nos Piscadornan, nos mester zorg pa nan seguridad den boto y riba lama cu sistema di comunicación pa sigura cu tur nos piscadornan tin asistencia IMMEDIATO den cualke emergencia. Tambe nos mester percura pa gasoline/gasoil na prijs barata pa tur Piscador di ofishi. Y pa sigura cu tur cuidadano o cuidadana por cumpra su boto/motor y otro equiponan e Gobierno nobo di MEP lo bin cu e Banco di Desaroyo / Banco di Pueblo pa TUR Piscador por haya e prestamonan necesario na condicionan humano y sensato cu interés sumamente abao pa asina nos juda TUR nos piscadornan realiza nan meta y projecto.

E meta cu nos tin cu e plan aki ta pa tene e prijs di pisca na bon prijs pa nos Pueblo alavez tene e gastonan di pesca abao pa asina nos Piscadornan tambe por tin un bon entrada.

Manera AVP ta matando nos Pueblo Piscador cu gasoline carisimo, cobransa carisimo di belasting pa boto ta momento pa nos como Pueblo nos bisa AVP: TA BASTA NO MÁS.

Ta momento pa nos Pueblo eligi un Gobierno nobo di Pueblo cu lo bai asisti y yuda henter nos Pueblo bai padilanti y progresa. Anja 2017 ta e anja di decision e anja di CAMBIO y pa e causa aki nos di MEP ta trahando durísimo pa gana e confiansa decido di henter nos Digno Pueblo.

Glenbert F Croes
Miembro di Parlamento
Fracción di MEP

Expresionnan haci den e articulo aki no necesariamente ta refleha opinion di ArenaPoliti.co