Den conferencia di prensa ultimo, Parlamentario Glenbert Croes a manda un advertencia pa Gobierno di AVP relaciona cu e situacion unda WEB N.V. no a haya combustibel na ora.

“Mi kier uni mi mes na e preocupacionnan cu ya compañero amigo y colega di partido Karel Maduro a expresa: Hamas WEB por keda sin haya combustibel. Hamas nos pueblo por keda sin awa y coriente.

E situacion unda WEB a keda sin combustibel a bati na nos porta na Aruba unda cu si no ta pa e expertonan di refineria di Aruba N.V. y di WEB N.V., nos pueblo lo a keda sin awa y coriente envista cu WEB lo no tabatin combustibel pa sigui produci awa y coriente. Ya caba awa y coriente ta carisimo y riba dje WEB keda sin combustibel? Inaceptable.

Ta pesey nos di MEP lo urgi Parlamento di Aruba atravez di comicion permanente of otro mecanismo di reunion parlamentario pa convoca un reunion di urgencia cu Utilities N.V., WEB N.V., RDA N.V. y Citgo Aruba N.V. tur hunto. Cu un solo proposito: Con nos ta bay sigura cu hamas un situacion asina cu surgi bolbe ripiti.

Resaltando e rol importante cu expertonan di refineria di Aruba N.V. a hunga den yuda WEB N.V. resolve e problema aki door di haya fuel oil di Curoil, nos ta sumamente preocupa kende y cua compania ta carga responsabilidad y gastonan pa erornan cometi unda cu e combustibel entrega no tabata cumpli cu e rekesitonan di WEB unda hasta pa evita problema mas grandi WEB a bay over na usa diesel cu ta mucho mas caro cu fuel oil.
Nos ta ripiti: un situacion asina hamas por ripiti. Pesey nos ta contento cu Valero Marketing & Supplies awor ta di refineria di ARUBA N.V. (di pueblo) pa asina niun compania por chantahea Aruba of laga nos sin combustibel. Nos tin e independencia den suministro di nos mes fuel y tur otro combustibel sea ta diesel, gasoline, jetfuel etc. pa cumpli cu e necesidadnan di nos pueblo.

Pesey mi no ta compronde con por ta Gobierno di AVP en particular Mike Eman, Ministro Presidente, Mike de Meza, Ministro di Turismo, Paul Croes, Ministro di Labor y Richard Arends, Ministro di Economia ta considerando pa laga refineria di ARUBA N.V. cay pa nan no controla Citgo su cumplimiento cu e acuerdonan firma pa loke ta e empleo di nos trahadornan local y e empleo di nos contratistanan local y e inversionnan grandi cu Citgo mester realisa den revitalisa, reconstrui y rehabilita e refineria di Aruba.

Pena la vida Gabinete Mike Eman 2 laga refineria di Aruba N.V. cay cu ta compania patrimonio di nos pueblo. Pena la vida Gobierno di AVP: boso ta adverti,” e Parlamentario te conclui.

Expresionnan haci den e articulo aki no necesariamente ta refleha opinion di ArenaPoliti.co