A intercambia di informacion y a delibera riba pasonan pa tuma     

ORANJESTAD - Minister di Asuntonan Economico Richard Arends tabatin un encuentro cu miembronan Foreign Investment Task Force y a splica e meta di e reunion . "Na aña 2015 despacho di Minister encarga cu Asuntonan Economico a instala un comision cu a wordo yama 'Foreign Investment Task Force'. E ta un plataforma unda departamentonan crucial di gobierno y actornan di sector priva cu ta yega na inversionistanan y otronan cu kier forma parti di e gateway di Aruba, ta comparti informacion y datonan cu otro. Aki nos ta papia entre otro di oficina di Ministerio di Asuntonan General, di Asuntonan Economico, pero tambe Dienst Buitenlandse Betrekkingen, Bureau Innovatie, Free Zone, ARINA, departamento di  Asuntonan Economico y departamento di Adkisicion Economico di Arubahuis".

Minister Arends a splica cu intencion ta pa intercambia informacion y mantene un lista di potencial clientenan cu nan establecimentonan por contribui na un gateway pa Aruba. "Aruba como portal di negoshi por garantisa empleo y actividadnan economico pa empresanan local." E reunion tabata parcialmente enfoca riba informacion di parti di Minister riba su bishita na Hulanda unda el a sinta cu VNO-NCW y cu World Startup Factory y e otro parti di e encuentro a bay riba e retonan di companianan cu ta interesa den haci negoshi for di Aruba. Esey ta negoshinan cu ta estableci aki y ta brinda nan servicio na Aruba y region.

"Si como gobierno bo ta promove un economia di conocimento, e rol di un Task Force asina ta hopi importante, pa entre otro  e conexion importante cu e tin cu e actornan den sector publico y semi-publico. Nos a inventarisa kico ta e pasonan cu algun inversionista mester tuma  y asina percura pa nan por establece nan mes aki na Aruba y usa nos isla como hub di negoshi entre Latino America cu Aruba".

Pa loke ta sectornan top Arends a bisa cu Gabinete Mike Eman a presenta cinco zona fisico unda ta mira potencial pa actividadnan economico. "Nan ta e zona rond di e refineria, e zona rond di e waf nobo na Barcadera, e zona unda antes tabata e waf di container na Oranjestad, e zona cu tin rond di Green Corridor di tur e proyectonan infrastructural y e zonanan rond di hospital. Nos kier desaroya e 5 zonanan aki a base di 4 sector top di cococimento. Cu ta logistica, tecnologia berde, pero tambe exportacion di nos conocimento den e area di turismo y otro conocimentonan cu nos tin aki y por exporta pa region y e industria creativo." Minister Arends a conclui cu a base di e criterianan aki ta mira si tin companianan cu ta interesa den Aruba y Aruba ta interesa den nan cu por contribui na mas actividadnan economico y por garantisa empleo , ta discuti esaki den e Foreign Investment Task Force y nan ta wordo facilita pa por establece nan mes aki na Aruba.

Expresionnan haci den e articulo aki no necesariamente ta refleha opinion di ArenaPoliti.co