Aña pasa na December 2016 AHATA (gremio comercial) a bisa cu nan tabata spera un prome kwartaal fuerte. Esaki ta leu di e realidad di turismo di nos pais. Mike Eman y su grupo di Alibaba no sa mas kico pa gaña nos despues di a enriquece nan mes cu tur nan dealnan pro nan cartera y anti esun di nos pueblo. Nos hendenan ta sclama pa un cambio y September ta basta leu ainda. Na October 30% MENOS, November 28.7% MENOS, December 2016 18.1% MENOS y awo Januari 2017 14.25% MENOS. Nos ta hopi mal para, e calidad di turismo ta hopi abao cu resorts outdated compara cu e region y otro partinan di mundo. Aruba NO ta un top destinacion mas. Esaki ta e logro di e tal Otmar di POR cu awo ta papia di un revolucion economico. Despues di 8 aña como Minister nos tin un turismo na suelo. 

Manipulacion
Mike Eman enberdad a haci un bon trabao cu e manipulacion cu el a logra haci den gobernacion. Awo e ta bishita nos sector primario y ta encarga cu cultura. E Prome Mandatario di nos pais no tin cunes cuanto nos digno pueblo ta sufri. Sigui fiesta y saca potret anto turismo nos unico pilar economico ta den un coma eterno bao awo Minister fracasa den Finansa, Economia y awo Turismo. E minister aki ta laga un politico di Boneiro riba payroll di pais Aruba y su casa dirigi nos turismo atraves di ATA. Si esaki no ta un abuso anto kico por wordo considera un abuso? Priminti nos pueblo dos pilar economico nobo anto despues di 8 aña un refineria cera cu lo cuminsa draai net prome cu eleccion pa manipula mente di hende atrobe.

Calidad inferior 
Mike Eman ta sigui endeuda nos pais cu proyectonan PPP manera Ringweg III. Ta kico tin den e proyectonan aki cu MESTER bin? Ni cuanto experto financiero ta bisa gobierno pa STOP di crea debe pasobra Aruba no por carga mas. Na Colombia e compania Odebrecht ta financia campaña electoral di 2014, anto na Aruba Mike Eman tin casonan sumamente preocupante cu e famoso Hard Rock hotel di POR, Roberto Rincon cera na Merca, Francisco Kiko cera na Colombia y colmo de los colmos Span Ospina cera na Aruba cu ta intimida y menaza lider di Movimiento Electoral di Pueblo riba TeleAvp (nos planta nacional) pa 6 minuut largo. Un berguensa pa yama e cos aki democracia pasobra ta un dictadura masha dia caba. Oranjestad economicamente ta morto y San Nicolas tambe. Otmar di POR kier a duna San Nicolas e hotel mas barata "budget" All-inclusive na Seroe Colorado mas di 1000 camber, anto den Caribe tin hotelnan manera Grand Vela, Royalton, Kimpton, Zoëtry, Sandals y Banyan Tree pa no lubida Melia cu gobierno di MEP kier a trece. Ainda tin hende cu ta durf di kere den politiconan burdugo manera esnan di AVP den Parlamento y supuestamente representantenan di San Nicolas??? Jose Feliciano y Stevie Wonder mes ta wak e cos aki. Ban Hunto P’e Cambio pasobra nos ta e joke awo den Caribe y pata pata di debe y un criminalidad hamas bisto.

Expresionnan haci den e articulo aki no necesariamente ta refleha opinion di ArenaPoliti.co