Recientemente tin un yiu di tera a termina su specialisacion como longarts na Spaña.
E specialista Arubiano aki a labora na ImSan durante un tempo corto, despues di a termina su estudio di medicina basico na Colombia. Su ambicion y pasion sinembargo a hibé sigui un estudio mas avansa riba e tereno di pulmonologia na Spaña. Durante e periodo aki e yiu di tera aki a contrae matrimonio cu un otro hoben Arubiano y hunto nan a forma un famia, pero semper den nan mente a keda e proposito pa regresa nan Tera Natal pa asina contribui na yuda eleva e cuido medico.

E mayornan di ambos hoben Arubiano semper a para cla pa yuda nan yiunan logra nan meta, pero mester a constata cu e posibilidad pa nan yiunan bin establece nan mes na Aruba tabata wordo torpedea pa un propio colega medico cu a sigui e mes un specialisacion como longarts, y cu a escohe na 2013 pa bandona su carera como specialista voluntariamente y inicia un rumbo nobo como politico.

E actual minister di salubridad ta bon na altura con e mes a wordo nenga na prome instancia e oportunidad di bin eherce su profesion como longarts na Aruba dor di e director medico anterior, esta sr. Boesten.

Como minister es tempo ey encarga cu salubridad, mi a para e maneho descabeya y discriminatorio pa cu yiunan di tera di parti di e director medico aki, y mi a exigi pa tuma Sr. Schwengle den servicio. Esaki tambe a tuma lugar, y sr. Schwengle por a bin establece su mes na su Isla Natal.

Nos por a spera un otro forma di proceder di e minister aki pa loke ta toca e solicitud di un colega specialista Arubiano pa bin establece su mes na Aruba. Principalmente si nos tene na cuenta cu e mes, tempo cu e tabata traha ainda como longarts, a laga sa cu malesanan di pulmon a aumenta na Aruba y cu expansion di e cantidad di longarts no tabata un luho. Na di dos lugar su mes un gobierno a declara di kier a crea un hospital y cuido di 5 strea pa e pueblo di Aruba, y finalmente a haña e bendicion di parlamento di Aruba pa cuminsa cobra 1% di healthtax cu e fin pa mehora e cuido medico na Aruba.

Sin misericordia sinembargo e minister a dicidi di no duna e dokter specialista Arubiano aki e oportunidad cu e sí a wordo brinda, y a nenga su solicitud. Es mas, sr. Schwengle diripiente a cambia di opinion y a dicidi na final di 2014 pa haci un peticion na e directiva di hospital pa haña e chens pa traha parttime como longarts pa asina e no perde su acreditacion como longarts segun e ley hulandes. Strobando un yiu di tera pa bin traha na su isla natal. Con egoista un hende por ta?? Claro cu e no ta cumbinie pa duna e dokter specialista yiu di tera aki e chens pa bin traha na Aruba. Cu otro palabra e minister aki ta hiba un maneho anti-yiu di tera y sirbiendo su propio interes.

Colmo di e maneho aki ta e hecho cu recientemente AZV a informa cu dr. van der Linde lo bay cu pensioen, y segun nos informacion AZV y e minister anti-yiu di tera aki, a bay di acuerdo pa un dokter naci na Irak, cu a studia na Oekraine, cu tin dos aña trahando na VU, bin traha den lugar di dr. van der Linde. Unda nos propio yiunan di tera a keda? Con a para cu e opleiding di huisarts na Aruba mes, cu mi persona a inicia, a keda? Segun mi informacion tin varios yiunan di tera cu a haci e opleiding aki na Hulanda tambe cu no ta haya e oportunidad pa bin nan pais back.

Mi kier a urgi e parlamentarionan di Aruba pa tuma nota di e forma di proceder aki di e minister, y mi ta urgi nan pa tuma accion y no permiti pa e dokter hoben aki no haña e oportunidad pa bin traha na Aruba.

Demostra amor patrio y exigi di e minister pa tuma e specialista aki den servicio di hospital, y exigi tambe un cambio radical di e maneho anti-yiu di tera di e actual minister di salud.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, februari 3, 2015

Expresionnan haci den e articulo aki no necesariamente ta refleha opinion di ArenaPoliti.co