Na augustus 2012 a tuma lugar un Dialogo Social den cual Gabinete Eman a presenta su vision den cual na aña 2020 Aruba lo ta liber di uso di heavy fuel oil. Durante e Dialogo Social aki e gremio y sindicato di nos Pais a bay di acuerdo pa stabilisa e prijs di coriente por medio di hedging cu ta tuma lugar na WEB. Den e mesun Dialogo Social aki a tuma e decicion pa WEB por haci conversion necesario pa bay draai su makinaria riba gas y di e manera aki haci menos uso di heavy fuel oil. E gas pa WEB lo wordo produci pa e proyecto ‘waste to energy’ di e compania Ecogas kende lo haya mayoria di sushi na Aruba pa kima. Debi cu WEB a haci inversionnan cu su propio placa pa haci entre otro proyecto di waste to energy posibel, e situacion financiero di WEB ta delicado. Remarcabel ta cu den e Board di Supervicion di WEB tin dos ehecutivo cu ta liga directamente cu e compania aki. E conflicto di interes aki den WEB mester wordo investiga.

WEB a haci inversion cu propio placa pa por acomoda Egogas
Ya for di October 2014 nos por a mira den medio di comunicacion cu Ecogas lo bira activo den Freezone di Aruba cu yudansa di e ‘begunstigend beleid’ di Gabinete Eman pa proyecto berde, y cu Ecogas lo converti e mayoria di sushi na Aruba den biogas cu lo ser usa na WEB. Pa haci esaki posibel WEB lo mester a entre otro instala tubo di gas for di Parkietenbos pa WEB. Durante e encuentro di Parlamento cu ehecutivonan di WEB y Utitilies a sali na cla cu WEB a usa su propio placa pa financia e proyectonan berde y for di medio di comunicacion nos a compronde cu e proyecto pa uso di biogas di Ecogas ta un di e proyectonan cu WEB a financia.

Dos persona den Board di Supervicion di WEB ta liga na Ecogas
Remarcabel ta cu den e Board di Supervicion di WEB tin dos persona cu ta liga directamente cu Ecogas. Ta trata aki di e Presidente di e Board, sr. Every, kende ta supervisory director di Metacorp, cual ta e compania cu ta maneha Ecogas. Banda di esaki tin miembro di e Board di Supervicion, sr Timmer, kende ta fungi como managing director di Ecogas y alaves ta supervisory director tambe di Metacorp.

Conflicto di interes evidente
Mirando cu ta e Board di Supervicion ta esun cu na WEB ta responsabel pa tuma decicion riba inversionnan miyonario na WEB, nos ta puntra nos mes con bin cu Utilities a permiti e conflicto di interes aki den WEB. Pasobra con por ta posibel cu e mesun managing directors di Ecogas ta tuma decicion na WEB riba un contract di WEB cu e mesun compania aki? Esaki no por! Den cualkier compania normal, no por existi un conflicto di interes obvio asina. Peor den un compania estatal cu ta encarga cu un trabou na bienestar di Pueblo, no por permiti cu esnan cu mester supervisa ta liga di e forma directo aki cu un compania priva cu ta haci negoshi cu WEB. E cos aki no ta etico y ta contra tur regla di bon gobernacion.

Pueblo mester haya un mihor splicacion
E conflicto di interes aki mester wordo investiga, pasobra Pueblo merece haya un mihor splicacion. Pa cu esaki nos di opocicion ta bay pidi un reunion publico pa Minister de Meza responsabilisa su mes na Pueblo.


22 maart 2015

Expresionnan haci den e articulo aki no necesariamente ta refleha opinion di ArenaPoliti.co