Perspectiva Independiente without background 001

Comision di Tweede Kamer a discuti Aruba su situacion financiero

(Tempo pa lesa: 2 - 4 minuut)

Awe mainta na Den Haag, comision di Tweede Kamer encarga cu asuntonan di Reino a reuni. E topico principal tawata Aruba su situacion financiero. Banda di e miembronan parlamentario, minister Plasterk (asuntonan di Reino) tambe tawata presente pa contesta pregunta.

Miembro di Tweede Kamer sra. Hachchi (D66) a haci pregunta y remarcanan critico tocante e impasse entre Aruba y Hulanda, y e aanwijzing cu Aruba a haya. E kier pa bin mas claridad tocante e actuacion di Rijksministerraad. Raad van State lo mester trece mas claridad riba e proceso cu a conduci na un aanwijzing.
Sra. Hachchi tambe a cuestiona e necesidad di e aanwijzing, remarcando cu gobierno di Aruba a tuma pasonan pa mehora e situacion financiero prome cu e KB. Segun sra. Hachchi e hecho cu Aruba ainda no tin un presupuesto firma pa aña 2014, no ta yuda drecha Aruba su situacion financiero. E tawata critico di minister Plasterk su (falta di) participacion den henter e proceso cu a resulta den un KB. Ela bisa cu e no ta defende gobierno di Aruba, pero e no ta ignora e otro banda di e medaya tampoco. Su pregunta y remarcanan a trece balansa den e reunion.

Parlamentarionan van Raak (SP), van Laar (PvdA) y Bosman (VVD) den hopi caso no tawata di acuerdo cu sra. Hachchi. Sr. van Laar ta culpa gobierno di Aruba pa e hecho cu presupuesto ainda no ta firma, bisando cu gobierno di Aruba mes tawata laat cu presentacion di e presupuesto. Segun sr. van Laar gobierno di Aruba pa basta tempo no ta cumpli cu loke nan mes ta bisa, y nan no ta tuma responsabilidad tampoco. Ela reclama cu (segun su persona) na Aruba tin mas discusion tocante cua presupuesto mester wordo firma prome (esun ‘original’ of e presupuesto ‘supletorio’), enbes di trata e contenido di e presupuesto. Tocante e impasse e ta bisa cu ambos Aruba y Hulanda tin culpa den laga e situacion escala te unda ela yega.

Parlamentario Bosman ta sostene e aanwijzing. Segun sr. Bosman, e islanan (Aruba, Korsou y St. Maarten) ta haci comosifuera cu nan ta independiente, pero mientrastanto e pagadonan di impuesto di Hulanda ta esunnan cu ta para garantia pa e finansas di e islanan. E la bisa cu e islanan menciona ta autonomo tanten cu nan tene nan mes na reglanan di statuto. Cu esaki e ta referi na e 'waarborgfunctie' di Reino. Manera ta conoci, sr. Bosman kier un cambio den statuto. E ta na fabor di un ‘gemenebestmodel’, caminda Hulanda no lo keda responsabel pa e islanan manera ta e caso awo.
Sr. van Raak, cu tambe ta na fabor di un ‘gemenebest-constructie’, a expresa cu gobierno di Aruba a presenta cifranan economico cuestionabel durante e ultimo añanan. Algo mester a wordo haci segun sr. van Raak.

Minister Plasterk a cuminsa su contestacion bisando cu e tin aprecio pa e vision y logronan di prome minister Mike Eman riba e tereno di sostenibilidad. Como ehempel ela menciona e contract cu a wordo firma cu e compania Hulandes Philips (pa lusnan LED). Ela indica cu ainda tin puntonan positivo den e relacion entre Aruba y Hulanda.
Sinembargo e ta bisa cu Aruba su situacion financiero ta malo pa basta tempo caba. Contestando pregunta di sra. Hachchi, ela expresa cu ta for di 2012 caba tin preocupacion y acuerdonan tocante Aruba su situacion financiero, y cu gobierno di Aruba no a cumpli cu acuerdonan haci. E incumplimento aki lo a resulta den e KB.
Segun sr. Plasterk, e islanan mester acepta cu un aanwijzing por wordo duna, pero mester wak e beneficionan di forma parti di Reino tambe. Beneficionan cu ela menciona ta e paspoort y e posibilidad pa bay Hulanda pa sigui studia. Segun sr. Plasterk e beneficionan ta bay man den man cu reglanan, cual den diferente caso a resulta den un aanwijzing pa e diferente islanan.

 

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

mail@arenapoliti.co

 

Advertising:

ads@bps.media

x

 

Inscribi pa ricibi un resumen semanal di e articulonan mas impactante.