ORANJESTAD – "E relacion di Aruba cu Merca un biaha mas a keda fortifica," asina Minister President Mike Eman ta afirma despues di e biahe di trabou na Merca cu tabata tin un agenda sumamente yen. Nos Prome Minister a hiba reunion y combersacion cu diferente instancia y ehecutivo halto di e potencia mundial. For di esakinan a acorda intercambio y colaboracion cu ta beneficia Aruba riba tereno di siguridad nacional, sostenibilidad, agricultura y educacion, entre otro. Merca ta wak Aruba como un aliado den e desaroyo positivo di region Caribense.

Pa Premier Eman, e reaccion aki di parti di Estados Unidos ta un estimulo pa continua cu e vision cu tin na cu nos pais. "E ta dunami un sentido di conviccion cu nos ta riba e bon caminda," asina Prome Minister Mike Eman a expresa. E ta pensa riba con hopi biaha ta tende di oposicion cu ta cuestiona si en berdad e vision berde aki ta e caminda pa cana. "Ora bo wordo presenta na henter mundo como e ehempel di pone un vision cla padilanti... Y en berdad, e no ta bay den e velocidad cu nos kier, pero tur cos mester bay den un forma responsabel pa e ta sostenibel y duradero."

Gabinete Mike Eman I y II a percura pa e lasonan entre Aruba cu Merca cada bes ta haya un profundidad adicional. E gobierno aki a habri un era nobo di comunicacion cu Merca; no solamente como un pais grandi cu ta yuda un isla chikito, pero a sinti tambe cu nos por yuda nan dor di ta un ehempel pa otro islanan. ‘Merca ta mira nos como 'added value' cu nan ta tuma cu ambos man,” asina Premier Eman a indica.

A papia tambe riba Pre Clearance na aeropuerto, FOL cu ta asisti den combatimento di crimen internacional hunto cu Warda Costa di Reino. Esaki ta un situacion cu otro islanan ta envidia y anhela ya cu nan ta den situacionnan desesperante. Otro reto pa nos nacionnan bisiña ta e maneho di hubentud, cual Aruba tambe ta trahando intensivamente pa medio di e programanan manera Formacion Social y Naschoolseopvang.

Durante e encuentronan sosteni, Merca a anuncia varios programa di cooperacion financiero pa conversion pa energia renobabel den e region. Esaki sigur ta yuda Aruba tambe mirando cu mester continua cu e siguiente 50% pa 60% di nos produccion y esey ta rekeri inversionnan. Tecnologia den arkitectura y acuerdo di cooperacion cu un di e ciudadnan mas prometedor den henter e pais, ta otro di e areanan cu a keda cubri pa e bishita Minister President Mike Eman na Merca.

Expresionnan haci den e articulo aki no necesariamente ta refleha opinion di ArenaPoliti.co