PARLAMENTO A AUMENTA SU PROPIO PRESUPUESTO

ORANJESTAD -- Parlamento di Aruba diamars ultimo a trata su propio presupuesto pa 2015. Lider di MEP Evelyn Wever-Croes a informa durante conferencia di prensa dicon e fraccion di MEP a vota CONTRA e presupuesto di parlamento pa 2015.

Pa regla e presupuesto di Parlamento mester wordo trata prome cu esun di Gobierno, hunto cu esun di Raad van Advies y Algemene Rekenkamer. Sinembargo ainda e presupuesto di Raad van Advies ta den man di Minister Mike Eman, y e no a mand'e Parlamento ainda. Esaki ta demostra e falta di respet cu Mike Eman tin pa cu e departamento importante aki.
Fraccion di MEP no por a sostene e presupuesto di Parlamento 2015 pa dos motibo.

PARLAMENTO A AUMENTA SU PRESUPUESTO DEN TEMPO DI CRISIS
Mientras tur departamento di gobierno mester hala faha mara, y corta rigurosamente den nan propio presupuesto, Presidente di Parlamento a aumenta e presupuesto pa 2015. Esaki ta algo cu lider di MEP no por acepta. No por ta asina cu no tin placa pa paga schoolgeld, y mayornan mester paga 250 florin mas pa cada yiu. Cu no tin placa pa cuida nos grandinan, nos muchanan especial, y muchanan cu no tin hogar. Pero Parlamento si ta aumenta su presupuesto, y gastonan di biahe ta aumenta cu 20%. Evelyn Wever-Croes a splica cu pa e motibo ey, no por sostene e presupuesto. MEP kier mira cu ta hala faha mara di ariba bin abou, pues cuminsando ariba prome. Y den esey Parlamento mester duna e ehempel.
Marisol Lopez-Tromp a reacciona bisando cu gobierno no tin nada di bisa Parlamento, cu Parlamento ta para riba gobierno. Esey a cai manera un bom, pasobra e arogancia ey fraccion di MEP ta distancia su mes di dje. "Den e tempo di crisis y austeridad, nos como parlamentarionan mester duna e ehempel, y no por aumenta nos mesun presupuesto, mientras cu pueblo ta sufri", Lider di MEP a duna di conose.

MEP NO POR APROBA E MANEHO DI PRESIDENTE DI PARLAMENTO PA SILENCIA OPOSICION
Un otro motibo cu no por a aproba e presupuesto ta pasobra aprobando e presupuesto bo ta aproba tambe e maneho di e Presidente di Parlamento, y su maneho especialmente contra oposicion, ta uno cu ta laga di desea. "Nos reunionnan no ta wordo yama, nos no ta haya documentonan cu nos pidi, nos no ta haya tempo pa prepara pa debatenan, y nos spreektijd durante debatenan ta wordo corta. Democracia ta wordo trapa constantemente, y ta mas cu logico cu nos di MEP hamas por aproba esaki", Evelyn Wever-Croes a duna di conose. "Anja 2014 tabata e peor anja cu parlamento di Aruba a conose desde cu nos ta un pais, y ta debi na mal funcionamento di parlamento, cosnan a pega asina mahos. E mayoria den parlamento cu a scohe pa no carga nan responsabilidad y controla gobierno, a pone cu e problemanan a escala. Y mi no a mira ni sinti cu e presidente di parlamento ta sinti cu algo a bai malo. Es mas, el'a purba hustifica tur accion, y hasi manera cu tur cos a bai bon".

Expresionnan haci den e articulo aki no necesariamente ta refleha opinion di ArenaPoliti.co