Lider di MEP Evelyn Wever-Croes a reacciona riba e noticia oficial cu morto di Mitch Henriquez a wordo ocasiona pa abuso policial.
"Maske ta algo cu nos a pensa caba, toch ora bo haya e informa oficial ey, e ta un sla duro. Con cu bai bin, polis ta esun cu mester proteha bo, defende bo di agresor, y den e caso aki net esun cu mester a protehe y defende Mitch ta esun cu a causa su morto. Esey ta algo condenabel. Especialmente pasobra nan a purba tapa esaki den prome instante.
Na e momento aki mi pensamento ta bai na Mama di Mitch, na su yiunan, su rumannan, su pareha, tur su demas famia y amigonan, pasobra pa nan e noticia aki ta hopi duro.
Mi ta spera si cu Ministerio Publico y recherche hulandes actua cu prudencia y cu cautela. Pasobra ta nan prome declaracion diadomingo, cu Mitch lo a bira malo despues cu nan a detene, a lanta hopi rabia. Esey a sende e mecha cu te awor nan no a logra paga, te cu cosnan a sali for di man na Den Haag. Nan sigiente pasonan lo determina si e agitacion y rabia por baha si of no. Pasobra nos a keda bastante alarma di scucha cu e agentenan policial envolvi simplemente a wordo suspendi y no deteni, pendiente e investigacion. Nos ta spera e investigacion caba pronto y pa esnan responsabel di e morto di Mitch wordo responsabilisa y castiga pronto.
Mientras tanto mi ta den contacto cu e famia, cu Minister Plenipotenciario na Den Haag, y cu ministerio di asuntonan di Reino, pa keda na altura di e investigacion.
Nos a ricibi mensahenan di condolencia di parlamentarionan di henter Reino, Curacao, Boneiro y Hulanda, y nos ta aprecia e atencion cu nan tur ta dunando na e caso aki, cu a shock henter Reino.
Nos ta asistiendo e famia y preparando pa yegada di e curpa di Mitch pa su entiero, probablemente na principio di otro siman. Nos lo no descansa te ora husticia vense den e caso aki, y esnan responsabel carga nan responsabilidad. Cu Mitch sosega na pas.

Expresionnan haci den e articulo aki no necesariamente ta refleha opinion di ArenaPoliti.co