HULANDA KIER UN CONSEHO CU TA LAGU'E LIBER PA ACEPTA OF NENGA

Na mei di e aña aki delegacionnan di e parlamentonan di e cuatro paisnan den Reino a yega na un consenso pa prome biaha den 60 aña di Statuto Reino, pa crea un areglo pa atende cu diferencianan di opinion y cu conflictonan entre dos of mas pais di Reino. E areglo a ensera cu ta uza un organo independiente of crea un corte nobo pa atende cu temanan di conflicto entre paisnan di Reino. A acorda cu tur e paisnan di Reino lo ta obliga pa acepta y ehecuta e desicionnan di e corto of instancia imparcial aki. A acorda cu lo busca intermediacion den un conflicto pa purba yega na un acuerdo prome cu bay e "corte". Y a acorda cu e "corte" aki lo trata asuntonan legal cu tin di haber cu Statuto y otro ley y reglanan cu tin di haber cu Statuto di Reino. Nos tabata contento cu porfin despues di 60 aña ta yega na un acuerdo asina pa crea e "geschillenregeling" pa Reino.

CONFERENCIA DI MINISTERNAN
Na juni e aña aki e Prome ministernan di Aruba, Corsow y Sint Maarten a reuni cu e minister di Asuntonan di Reino, sr Plasterk di Hulanda pa concretisa e areglo di conflicto cu Parlamentonan unanimamente a acorda un luna prome. Pa tur hende su sorpresa gobierno Hulandes a pone e acuerdo di e parlamentonan un banda. Den su luga gobierno Hulandes a propone algo totalmente diferente. E esencia di e proposicion Hulandes ta cu no lo usa un corte existente of crea un corte special, pero lo usa e Raad van State di Hulanda como e instancia pa atende cu conflictonan. Pero pio ta cu Hulanda no kier pa e desicion di e instancia aki ta mara nan. Den su luga nan kier pa e instancia no duna un veredicto, pero solamente un conseho. E diferencia ta cu un veredicto lo obliga tur pais pa tene nan mes na dje. Un conseho ta algo cu nan por djis tuma nota didje y pone un banda. Mescos cu gobierno di Hulanda kier haci cu e ultimo conseho di Raad van State riba e 'KB' cu gobierno Hulandes a impone riba gobernador di Aruba aña pasa. Raad van State ta bisa den nan conseho cu e KB tabata ilegal. Gobierno Hulandes ta pone e conseho un banda y bisa cu e KB tabata masha bon. Gobierno Hulandes no ta sinti e obligacion pa tuma e conseho aki na serio y cambia nan maneho.

KICO AWOR?
E consecuencia di e posicion intransigente y contra di acuerdo entre parlamentonan di e cuatro paisnan di Reino aki ta, cu gobierno Hulandes ta bolbe stroba creasion di un areglo di conflicto transparente y efectivo na cua tur pais ta mara, manera ta e caso cu un corte di husticia. Esaki ta nifica cu nos tin cu bolbe bek na mesa cu parlamentonan di Reino riba e tema aki. Esaki lo sosode durante di e siguiente reunion entre parlamentonan cu lo mester tuma luga na Sint Maarten na januari otro aña. Parlamentonan di Aruba, Corsow y Sint Maarten lo reuni prome cu esey pa fiha un punto di bista comun. Pa nos no tin niun motibo pa desvia di e acuerdo cu nos a logra na mei e aña aki. Kier men cu nos ta bay traha pa realisa e acuerdo di IPKO di mei 2015, pasobra e ta bon pa tur pais di Reino. Pasobra e ta duna un dimension di transparencia y democrasia na gobernacion di Reino cu e no tin ainda despues di 60 aña.

Expresionnan haci den e articulo aki no necesariamente ta refleha opinion di ArenaPoliti.co