Mester tin un motibo tras di cada KB, aanwijzing, CFT y screening

Aña 2015 a habri den Parlamento di Aruba cu reunion Tripartiet entre Aruba, Curaçao y Sint Maarten den cual varios tema a wordo trata den preparacion di e Reunion Interparlamentario di Reino (IPKO) cu ta tuma lugar e siman aki na nos Pais. Un punto cu sigur ta wordo discuti riba dje ta e intervencionannan cu tabata tin ultimamente den Reino den cual ta menciona KB, aanwijzing, supervicion di CFT y screening. E intervencionnan sigur ta causa friccion ya cu Paisnan cu ta autonomo den Reino ta supose di por goberna trankil sin wordo molestia pa otro y sigur sin cu Reino, referiendo aki na Hulanda, impone reglanan con pa hiba gobernacion na cada Pais. Pero 2014 sigur a demostra nos cu Hulanda no ta bay laga e Paisnan haci deshaci den gobernacion y a recuri na intervencion pa asina por tin un “vinger in de pap” den gobernacion di e otro Paisnan den Reino. Pesey lo ta bon pa nos para keto y puntra nos mes dicon Hulanda ta “molestia curpa” pa interveni na e otro Paisnan autonomo den Reino, siendo cu na Hulanda mes nan ta man yen di problema y bou precion di Europa. Mester tin un motibo tras di cada intervencion y pesey durante e reunion di Tripartiet nos a trece e pregunta aki dilanti cu e peticion pa cada delegacion los di e puntonan cu lo wordo trata den IPKO, pensa riba e motibo pakiko Hulanda lo kier tin un “vinger in de pap” den gobernacion di nan Pais. Un contesta riba e pregunta aki sigur lo mustra nos unda nos ta para awor como Pais autonomo den Reino y kiko nos por spera e tempo nos dilanti den Reino Hulandes.

5 januari 2015

Expresionnan haci den e articulo aki no necesariamente ta refleha opinion di ArenaPoliti.co