Manera ta conoci caba door di pueblo di Aruba e situacion financiero ta uno precario. Ademas di esaki ta importante pa remarca cu Gabinete Eman ta continua ta violando reglanan di comptabilidad. Den cuadro di esaki nos fraccion a manda pidi un reunion cu caracter di urgencia cu Minister di Finansas sr. Bermudez. Specificamente nos kier pa e minister concerni informa nos tocante e status di presupuesto 2015.  Te dia di awe parlamento no a ricibi esaki siendo cu esaki mester a wordo entrega aña pasa na september. Ademas di esaki nos kier wordo informa ki tempo nos lo por spera esaki pa trat’e. Sin exclui nos a pone enfasis riba e hecho cu nos mester haya suficiente tempo pa e preparacion pa no sosode loke cu a pasa cu presupuesto 2014 cual a haya apenas 2 dia siendo cu instancia manera Raad van Advies ta tuma por lo menos 6 siman pa studie y duna su conseho
Adicionalmente ta importante  pa wordo informa tocante e conseho di CFT y cual recomendacion lo bay wordo implementa y cual no. Si encaso esaki no wordo sigui cual ta e argumentacion y cual otro alternativa lo por wordo considera. E ta necesario pa haya e informacion aki pasobra lo nos no kier mira otro confrontacion cu Hulanda. Nos ta spera cu Prome Minister no mester bolbe bay den un huelga di hamber. Sin laga afor un bista real di debenan cu lo madura den e siguiente 6 lunanan y con esakinan lo wordo paga. E ta di lamenta cu e gobierno aki ta sigui hinca nos den mas debe! Esakinan ta djis algun di e puntonan cu nos fraccion como representante di pueblo lo kier haya aclaracion riba nan.

Expresionnan haci den e articulo aki no necesariamente ta refleha opinion di ArenaPoliti.co