Xiomara Maduro: Ta Parlamento y Gobierno mester haci nan trabou awor cu Raad van Advies a duna conseho
Poco dia pasa e Comicion Financiero di Parlamento a reuni den un forma di excepcion cu Raad van Advies pa asina Parlamento por haya mas splicacion riba nan conseho riba e Presupuesto 2015 di Pais Aruba. Na final di e reunion e fraccion di AVP a pidi pa Raad van Advies pone riba papel cual conseho Gobierno a cumpli cune y kiko ainda Gobierno mester cumpli cune. Pero Raad den su carta di 2 di april ultimo a contesta, cu conforme ley, Raad a cumpli door di duna su conseho na Gobierno. Na su turno, Gobierno a duna su opinion riba e conseho di Raad y Gobierno a manda e presupuesto pa Parlamento. Awor ta na Parlamento y Gobierno pa haci nan trabou y ta Gobierno ta esun cu mester splica dicon e no ta cumpli cu tur e consehonan di Raad.
Mester remarca cu Raad den e carta aki a bolbe acentua cu e esencia di nan conseho ta pa yuda yega na un finanzas publico sostenibel. Den nan conseho nan a tene cuenta cu e diferente acuerdonan cu Gobierno mes a sera, manera e Acuerdo di Diahuebs Santo pa yega na fianza di Hulanda na interes reduci, y e Acuerdo di Balanced Budget cu ta e plan di Gabinete Eman pa drecha nos finanzas publico. For di e conseho di Raad y e contesta di Gobierno, ta bira bisto cu Gabinete Eman no ta cumpli cu su mesun palabra. E cifranan presenta den e Presupuesto 2015 no ta cuadra cu locual Gobierno mes a propone di haci segun e acuerdonan firma. Pero manera Raad a remarca, e no ta na Raad, pero ta na Parlamento awor pa haci e trabou di mustra Gobierno cu nan no ta cumpli. Y ta na Gobierno pa splica na Parlamento y Pueblo pakiko nan no ta of kier cumpli cu e consehonan di Raad y pakiko nan ta papia bunita y haci otro. Raad van Advies a cumpli cu su trabou di duna conseho. Awor ta Parlamento y Gobierno mester haci nan trabou.
14 april 2015
Expresionnan haci den e articulo aki no necesariamente ta refleha opinion di ArenaPoliti.co