Contrario na loke e lider di MEP a bisa y scirbi ayera, ta net e partido MEP ta contra Banco Central. O miho bisa, ora ta cumbini MEP, Banco Central ta bon. Mescos ta conta pa Conseho Consultativo, Controlaria General, Corte di Husticia y Polis pa duna algun ehempel. Ora MEP no haya nan kier, ora nan no tende loke nan kier tende of ora e instancianan a-politiconan aki haci nan trabou, e partido MEP ta purba tur forma pa desacredita nan y ofende esnan cu ta traha eyden. E siman aki nos a bolbe wak e mes un patronchi inconfiabel y destructivo di MEP. Nos a wak esey ora MEP ta den gobierno. Nan a caba cu tur e instancianan importante aki. Awor nos ta wak e mes un actitud di MEP den oposicion.

BANCO CENTRAL
E moda cu MEP ta trata Banco Central ta un bon ehempel. Ayera na final di e reunion publico e lider di MEP a haya ta bon pa declara cu partido AVP ta contra Banco Central, contra nos moneda y asina ela sigui pa asombro di tur hende den sala di Parlamento y na cas. Pasobra su palabranan ta asina hipocrita cu no tin mester di splicacion. Henter Aruba conoce e forma cu MEP den gobierno a trata Banco Central. MEP a purba saca placa di Banco Central y a core cu e director ora ela nenga di duna e placa aki pa MEP sigui gasta. Apenas algun ora despues di e reunion publico di ayera, MEP por a mustra con serio nan ta anda cu Banco Central. Den un reunion cu Banco Central mes a pidi pa tene cu e comision fiho di Parlamento, niun miembro di MEP a presenta. Anto e tabata trata di un asunto cu ta importante pa Banco Central mes. Aña pasa ora Banco Central a presenta un ley pa limita e riesgonan financiero pa e banco y asina proteha mas nos banco, e partido MEP a vota contra! Anto awe nan kier acusa otro di ta contra e banco.

RAAD VAN ADVIES
Un otro bon ehempel di e menosprecio di MEP pa instancianan cu no ta permiti politica den nan seno, ta e Conseho Consultativo (=Raad van Advies). E organo imparcial aki ta duna gobierno y parlamento conseho riba tur ley. Nan ta haci esaki bon argumenta. No tur ora nan consehonan ta loke hopi hende kier tende. No tur ora nan tin rason tampoco. Pero semper ta respeta nan conseho. Ora no ta di acuerdo cu nan conseho bo mester argumenta bon pakico. Den gobierno MEP a duna Raad van Advies tur sorto di nomber y a desgaba nan ora nan a conseha contra di introduccion di e BBO. Siman pasa Raad van Advies a duna su conseho riba e desicion di Gobernador pa no firma e presupuesto 2014 y riba e 'KB' di gobierno di Reino. Raad van Advies a bisa cu tur dos tabata ilegal. Enbez di respeta e conseho di Raad van Advies, pasobra e no ta loke MEP kier a tende, a dicidi di laga ataca e presidente di Raad van Advies y bisa cu Raad van Advies ta bruha tera. Esey ta e respet cu MEP ta duna Raad van Advies y nan trabou!

OPORTUNISMO
E actitud oportunista aki di MEP ta tipifica henter e fraccion den Parlamento. Nunca bo sa unda nan ta para of pa kico nan ta para. Un dia nan ta bisa di ta contra illegalidad y otro dia nan ta defende actonan illegal di nan propio miembronan. Un dia nan ta bisa cu nan ta respeta Raad van Advies, pa otro dia nan caba cu e organo aki. Asina nan a haci cu cuerpo di polis ultimamente tambe. Tur hende y tur organisacion cu no ta pensa, haci y bisa loke nan ta bisa ta malo. Si bo no ta cu MEP, MEP ta contra di bo! Bo no por tin un propio opinion. Ora MEP ta fout, nan no por reconoce y nan no ta corrigi nan mes. Al contrario. Ora MEP ta "wrong" nan kier ta "strong" tambe.  

Expresionnan haci den e articulo aki no necesariamente ta refleha opinion di ArenaPoliti.co