IMF TA CONFIRMA MANEHO DI GOBIERNO DI AVP 

Den e "workshop" cu Banco Central a organisa cu riba renobacion di nos sistema di belasting, a bini hopi punto di maneho di belasting masha interesante dilanti. Un di e temanan mas interesante durante di e prome dia di e "workshop" tabata di e experto di IMF Russell Krelove. Den un presentacion riba trendnan internacional den renobacion di sistemanan di belasting, ela mustra cu hopi parti di mundo ta usa sistemanan di belasting indirecto manera BBO of manera e BAZV, pero cu no por usa e tipo di belasting aki pa tur meta. Experiencia rond di mundo ta mustra cu un belasting manera BBO of BAZV ta bon ta laga hopi hende tur contribui un tiki y asina trece placa den caha di gobierno. Pero experiencia a mustra cu e mes un tipo di belasting aki no ta sirbi pa por ehempel crea mas igualdad den reparticion di entrada of pa mehora forsa di compra di gruponan cu menos entrada. Pa logra esaki e experto di IMF ta bisa cu mester usa otro instrumentonan di maneho.

BBO
Ora bou di gobierno di MEP a introduci e BBO acumulativo na aña 2006, nos a wak con e belasting aki a causa un aumento di costo di bida di mas cu 10%. Esaki a reduci enormemente e forsa di compra di famianan. Especialmente esnan cu un entrada mas abou cu ya a sufri di tur e medidanan di MEP. Entre otro e aumento di prijs di coriente cu 250% ! Ora gabinete Mike Eman I a corta e BBO na mitar na 2010 pueblo no a sinti e efecto. Prijsnan no a baha. Kiermen cu e BBO a sirbi bon pa trece placa den caha di gobierno, pero e no a sirbi pa baha costo di bida of pa mehora forsa di compra. Pa tog logra su meta di mehora forsa di compra, gobierno di AVP mester a busca otro instrumento. Esaki a bira e "reparatietoeslag". Ta door di duna esaki a logra duna gruponan den comunidad cu un entrada abou, un mehoracion di forsa di compra. Enbez di bay via un belasting, a scohe pa pone placa directamente den cartera di famianan. A usa placa di pueblo pa mehora forsa di compra di pueblo. Esaki ta loke e experto di IMF tabata kier men ora ela bisa, cu pa logra metanan di igualdad,mester usa otro instrumento enbez di sistemanan di belasting cu a wordo diseña pa trece placa aden manera e BBO. Ta door di haci netamente esaki, cu trahadornan den sector priva cu menos di 2500 florin na salario pa luna a haya un mehoracion di forsa di compra mey mey di e crisis financiero y economico. Ta asina mas cu 20 mil pensionado a logra mantene forsa di compra. Ta asina nos co-ciudadanonan cu un handicap y mamanan soltera a haya e ayudo cu nan tabata tin mester. Ta asina ta usa placa di pueblo!

Expresionnan haci den e articulo aki no necesariamente ta refleha opinion di ArenaPoliti.co