E reto mas grandi di cualkier gobierno ta pa baha e deficit riba presupuesto. Gobierno Hulandes a tuma cinco aña pa baha su deficit di 5% pa 2%. Total 3% den cinco aña. Gobierno di AVP a baha e deficit riba presupuesto cu 5.6% den dos aña. Aña pasa e deficit tabata 3.7%. E aña aki e maneho financiero ta pa baha gasto y baha e deficit pa yega 2% na fin di aña. Tur cos ta mustra cu ta bay yega esaki tambe door di entre otro bahamento di gasto y crecemento economico.

Prome cu aña 2013 gobierno di AVP a fiha e maneho pa yega na presupuestonan balansa. E plan ta pa despues cu yega na presupuestonan balansa, ta cuminsa paga debenan cu nos pais a acumula den e ultimo 30 aña. Esaki lo ta posibel e ora, pasobra ora yega na presupuestonan balansa ta spaar hopi placa cu awor tin cu paga na interes. Pa yega na presupuestonan balansa mester baha gasto, pa asina mester presta menos. Ora presta menos ta paga menos interes y ta baha e deficit (= e cantidad di placa cu tin cu fia pa sera e presupuesto). E maneho di finansa for di 2013 ta dirigi riba baha e deficit gradualmente.
Den e ultimo dos añanan (2014 y 2015) e maneho di finansa pa yega na presupuestonan balansa a logra baha e deficit d 9.3% pa 3.7%. E aña aki e mester baha na 2%. Den e añanan cu ta sigui e deficit mester sigui baha pa yega e punto cu no tin deficit mas y tin un presupuesto balansa. Esey kier men cu e entradanan ta cubri e gastonan di gobierno.

RETO GRANDI
E reto grandi ta pa haci e bahamento di gasto y di e deficit, sin causa problema pa economia y creasion di cupo di trabou. E reto ta grandi pasobra ora gobierno baha su gastonan, e por gasta menos den comunidad. Generalmente tanto comercio como comunidad ta sinti esey, pasobra gobierno ta gasta mas cu 1 biyon florin pa aña den comunidad. Sinembargo, gobierno di AVP a logra pa baha gasto, no mishi cu e entrada di famianan of comercio y tog reduci e deficit gradualmente. E maneho pa logra esaki - baha gasto, pone economia crece y crea mas cupo di trabou - a y ta sigui duna bon resultado. Esaki a keda confirma atrobe den parlamento di Aruba e siman aki. Cu e maneho y e metanan fiho aki, pa prome biaha ta bay yega e punto cu e entradanan di gobierno ta cubri e gastonan di operasion di henter gobierno. Tambe pa prome biaha por bay paga debenan acumula den e 30 aña di Status Aparte. Logrando esaki pa prome biaha den historia di nos pais, gobierno di Aruba (AVP) atrobe ta mustra cu e maneho balansa cu semper a scohe pe ta e miho pa Aruba. E scepticonan, e criticonan, e opositornan y e negativistanan, tur lo mester reconoce cu e maneho cu a y ta hiba ta esun cu ta bon pa Aruba.

Expresionnan haci den e articulo aki no necesariamente ta refleha opinion di ArenaPoliti.co