ORANJESTAD - Na luna di maart 1948 Shon A Eman, 68 aña pasa, a haci entrega di un peticion di e pueblo di Aruba cu tabata lucha pa su soberania na Su Mahestad Reina Wilhelmina. Un peticion cu firma di 2147 hombernan Arubiano. E tempo ey hende muhe no tabatin derecho di voto. E mesun peticion aki a compaña e mocion cu Shon A Eman a entrega na Conferencia di Mesa Rondo 18 di maart 1948, unda porfin e lucha di Aruba su Status Aparte a keda reconoci. Dia 1 di janauri 1986 Aruba a yama bon bini na su Status Aparte. E deseo grandi di un pueblo balente a keda cumpli.

E aña aki Aruba ta celebra cu 30 aña pasa el a haya su Status Aparte. Den cuadro di esaki  Prome Minister Eman hunto cu parti di e comision cu a traha riba e buki di firmantenan, a bishita tres di nan diamars atardi. Sr. Alejandro Jose Gei di 99 aña a ricibi e buki rondona pa yiunan, nieto, bisanieto y tataranieto. Famia a keda masha contento cu e gesto aki. Nan a expresa nan gratitud na Prome Minister Eman pa a corda riba nan tata. Jose Pascual Fingal, kende e luna aki ta cumpli 97 aña a ricibi Prome Minister cu man habri. E ta corda e dia cu el a firma manera tabata ayera. Un hende masha simpatico cu yen di recuerdo y storia pa conta. Frans Croes di  95 aña tabata e siguiente firmante cu a haya bishita di Prome Minister Eman y e comision. E ambiente mescos cu cerca e otro dos firmantenan tabata sublime. Masha contento cu bishita di Prome Minister y e buki cu su potret y nomber aden.

Expresionnan haci den e articulo aki no necesariamente ta refleha opinion di ArenaPoliti.co