Pueblo por a ripara cu AVP hopi tempo caba a desvia di su promesanan y propio metanan vooral ora ta trata di sostenibilidad. Den e caso specifico aki tur hende por a nota Gabinete Eman ta papia un cos y hasi lo contrario. E realidad ta cu Prome minister Eman ta papia "GREEN", Minister Mike de Meza ta pensa "GREY" y Minister Benny Sevinger ta haci "BLACK"! Ta obvio cu ningun ta comprometi di brinda loke di berdad ta un desaroyo duradero pa pueblo sino mas bien ta tras di nan propio beneficionan. Logicamente nan actonan ta pone cu cada biaha pueblo ta consideranan mas corupto door di viola principionan di bon gobernacion y nan actonan contra moral y cu ta atacha nos estado di derecho.

Gobernacion den Gabinete Eman ta un free for all, esaki pueblo por a nota ora cu cada minister ta scoge nan propio direccion probechando di nan poder pa beneficianan mes cu loke a resta, ta hiba maneho contradictorio y conflictivo pero tambe ta trahando contra otro tras di lomba di otro. Prome Minister Eman mes ta mas den exterior cu na Aruba, hungando "embahador green" internacionalmente, mientras na Aruba e no a logra nada concreto riba tereno di sostenibilidad y menos riba e situacion social precario cu pueblo ta pasando aden. Na e otro banda bo tin un Minister di Energia y Economia de Meza ta pensa "GREY", hayando holor di GAS (cual porcierto no a wordu detecta ni explota den 8 aña, segun e compania explotador REPSOL !). Pero ya Minister de Meza ta hole e placa di GAS y oportunidad pa su propio interesnan. Ironico ta cu Minister de Meza publicamente a declara cu e refineria lo wordo DESMANTELA pero danki na un pueblo persistente cu a pone presion a logra cambia e rumbo y bai pa reapertura di refineria. Pregunta ta e ora ey: Kizas tur e esfuersonan aki ta pasobra Minister de Meza ta hole un OTRO GAS-DEAL y benedicio pa su compania? En todo caso gas ta box cu e pensamento di Prome Minister Eman y sigur NO TA "GREEN" y cuadra cu loke e supuestamente kier haci cu Aruba. Den tur e pensamento "GREEN" y "GREY" no a keda falta un Minister pa sigui bruha cos. Actualmente Minister Sevinger ta haciendo Aruba "BLACK" unda e "GREEN CORRIDOR" di Prome minister Eman ta transformando su mes mas den un "BLACK CORRIDOR" pasobra a rosa tur loke ta berde di flora y fauna rond e lagun di Balashi poniendo Black asfalt. Aparte cu e lo costa hopi placa e asfalt aki no tin un balor economico agrega ! Sin kita afor e maneho ambiental di Minister Sevinger a continua cu su BLACK-ACTION cu huma preto saliendo di Dump cual ta indica cu NADA no a cambia desde 7 aña pasa!

E punto central di e comunicado aki ta pa pone enfasis riba e hecho cu Aruba no tin un gobierno serio. Cada plan cu e propone of pensamento riba sostenibilidad ta wordo kibra door di propio mandatarionan cualnan interes personal ta resalta riba esun di pueblo. No tin un vision real di parti Gabinete Eman tampoco un compromiso pa cumpli cual ta ponebo conclui cu gobierno ta sin rumbo y no ta pensa riba bienestar general.

Expresionnan haci den e articulo aki no necesariamente ta refleha opinion di ArenaPoliti.co