"Entre e temanan mas importante pa futuro di nos pais, e tema di energia ta keda den top. E fuente di energia cu nos lo uza pa haya coriente pa nos casnan, scolnan, negoshinan, lo determina e prijs cu nos tin cu paga. E prijs lo determina kico nos lo haci y keda sin haci como pais y como individuonan. E lo determina nos calidad di bida. Pesey nos mester sigui tuma desicionnan crusial awor, riba con nos lo sigura coriente pa Aruba awor y den futuro. Pero tambe con nos lo sigura e miho prijs posibel." Esey Rene Herde', lider di e fraccion di AVP den Parlamento a bisa. Siman pasa ela indica caba cu den AVP nan tin custumber di wak padilanti y busca solucionnan pa futuro di nos pais. Den partido ta haci esey mientras cu den gobierno y den Parlamento ta atende cu e temanan actual. Rene Herde': "Anto e forma cu nos ta atende cu asuntonan actual den gobierno y parlamento, ta pone nos pensa mes ora tambe con ta miho pa atende cu temanan importante den futuro. Cada les awe ta un experiencia pa uza den futuro. Ta adina nos ta mehora maneho cu experiencia y prepara e siguiente generacion pa sirbi nos pais miho den futuro."

ENERGIA
No tin pais na mundo caminda e costo y consecuencia di forma di genera energia no ta un preocupacion. Pesey no tin pais na mundo cu no ta ocupa nan mes den un forma of otro cu e pregunta di con ta sigura energia pagabel den futuro. Aruba a scohe pa gradualmente cambia su fuente di energia di petrolio pa fuentenan natural (= biento, solo, lama). E argumentonan cu Aruba ta usa ta e argumentonan di sostenebilidad a largo plazo, cuido di medio ambiente, suministro di coriente sigur y un prijs pagabel awor y den futuro. Tur e argumentonan aki ta indica cu nos kier ta mas responsabel posibel cu futuro di nos pais (y cu mundo), cu nos kier sigura e miho prijs posibel cu famianan lo tin cu paga pa coriente y e ta indica cu nos kier ta menos dependiente posibel di otro paisnan pa nos coriente. Den tur analysis riba seguridad di energia pa futuro cercano y di largo plazo, ta e argumentonan aki ta sobresali rond di mundo.

KICO TA MIHO PA NOS?
Specialmente paisnan chikito manera Aruba, cu un economia chikito basa riba un base chikito y cu recursonan financiero limita, mester busca forma pa sigura cu nan ta haya energia na un prijs pagabel. Awor aki paisnan chikito ta paga 25% pa 30% di tur nan entradanan na petrolio of gas pa nan energia. Pa e paisnan aki e miho alternativa ta pa haci uzo di e fuentenan di energia renovabel cu nan tin. Aruba tin nan na abundancia. Nos tin solo, y biento tur dia di aña y nos tin lama cu tur su energia tur rond di nos isla. Si nos haci bon uzo di esakinan, no solamente nos ta sigura suministro di coriente pa semper, pero nos ta stop di depende di otronan pa nos energia. Si nos haci bon uzo di solo, biento y lama pa nos energia, nos ta sigura tambe coriente na e miho prijs posibel. Si nos depende di otronan pa nos coriente, ta otronan ta fiha e prijs cu nos tin cu paga. Si nos mes ta controla nos fuente di energia, nos mes por controla e prijs cu cada famia tin cu paga miho. E conclusion ta cu despues di analysa y compara tur fuente di energia pa futuro, cu uzo di tur e tecnologia nobo, energia di fuentenan renovabel ta miho pa Aruba. Mas lihe nos move den e direccion aki, ta mas miho e ta pa Aruba.

Expresionnan haci den e articulo aki no necesariamente ta refleha opinion di ArenaPoliti.co