Di dos parlamentario di AVP ta anuncia retiro den menos di un luna. 

Relaciona cu e anuncio di sra Desiree Croes cu e lo retira di politica, mi mester bisa cu ta di dos parlamentario cu ta bandona AVP den menos di un luna y ambos ta debi na falta di liderasgo di sr. Mike Eman. Den ambos caso e parlamentarionan no a sinti cu di parti di liderasgo di partido nan a haya e sosten den locual nan a trese padilanti. Mi mester enfatisa cu te e dia di awe nos di MEP no sa kiko ta locual sra. Desiree Croes kier a bin cune. Parlamento no a ricibi nada tampoco di sra. Desiree Croes. Awor nos ta mira un otro parlamentario ta anuncia su retiro, debi na falta di liderasgo. Si sr. Eman a mustra liderasgo, lo e discusion y debate publico  tocante e "amienda di Desiree" no a bai di e forma aki. Un debate cu a ranca famia y amigonan for di otro. Un debate cu a crea odio y desunion den nos comunidad. Un debate cu a laga heridanan hundo habri. Awor cu sra Desiree Croes a anuncia su retiro, no ta kita tur e dolor y ansha cu a wordo causa serca esnan cu ta na fabor ni esnan cu ta en contra di su pensamentonan. Henter un pueblo a wordo lastra den un discusion cu na prome lugar mester a wordo hiba paden den partido AVP. Y eynan sr. Mike Eman a bolbe faya, mescos cu ela faya cu sra. Lopez-Tromp y mescos cu ela faya cu henter e comunidad di Aruba. 

MESTER TRATA E TEMA CU RESPET 
E tema aki ta un tema delicado y semper mester wordo trata cu respet, tanto pa esnan cu ta na FABOR como pa esnan cu ta en CONTRA. E forma con AVP a scohe pa trata e tema aki no ta corecto y mi ta spera cu nan reconsidera esaki. Mi ta lamenta cu e prome minister di e pais aki ta faya nos pueblo di e forma aki, mi ta lamenta mas ainda cu ela permiti tanto odio wordo sembra den nos comunidad. Cu Dios guia nos y bendiciona nos dushi pais Aruba.

Expresionnan haci den e articulo aki no necesariamente ta refleha opinion di ArenaPoliti.co