DESEO PA 2017 (parti 2)    

Sta Cruz -- Un otro aña ta clausurando y nos ta preparando pa un aña nobo. Aña 2017 ta bai ta crucial pa henter nos comunidad. Ta e momento cu cada cuidadano ta haya pa dicidi e rumbo di nos pais. Esaki ta e momento pa dicidi di pone e ser humano central. E proteccion, e cuido y e bienestar di cada cuidadano mester haya prioridad riba gastonan di luho, mas klinker y mas asfalt.

PROTECCION Y SIGURIDAD DI CADA SER HUMANO
E aña cu ta cabando a conose casonan mas drastico di criminalidad. Atraco hasta den misa y oficina di gobierno, atraco cu a costa bida di hende. Esaki ta muestra cu atracadornan no tin respet mas. Ta momento pa nos cambia e rumbo aki. Mi deseo pa 2017 ta pa nos combati criminalidad cu man duro. Controla nos fronteranan prome, pa autoridad sa kiko y ken ta drenta y sali di nos pais, y una bes cu nos fronteranan ta controla, nos por pone orden paden den cas. Mi kier mira nos como comunidad hunto cu autoridad manda un señal bon cla pa e criminalnan cu nan no ta bai gana e guera aki. Pa logra esaki nos mester trese bek nos helicopter y radarnan, y nos mester inverti mas den Cuerpo Policial. Nos deber ta brinda proteccion na cada cuidadano. Tambe na nos muchanan, contra violencia sexual. Nos tin e deber di protehe nos muchanan.

CUIDO DIGNO DI SALUD Y DI NOS GRANDINAN
En bista cu e cuido di salud y cuido di nos grandinan ta laga demasiado di desea, mi deseo pa 2017 ta cu nos pone prioridad na e cuido. Trese e cuido mas serca di e cuidadano, creando mas centro di diagnostico, cuminsando den e area central di Aruba Paradera / Santa Cruz. Percurando pa nos yiunan di tera cu a studia medicina den region, por traha na Aruba, y asina corta e tempo di espera.
Nos grandinan, esnan cu a construi e pais aki, merece un cuido digno, sea cu nan ta bai biba den un cas di cuido, of si nan ta keda biba na nan cas, y ta nos deber como comunidad, pa brinda nan e cuido digno ey.

BIENESTAR
Ta asina so nos por logra bienestar pa cada cuidadano di nos pais. Den e ultimo 7 añanan e prioridad tabata riba embeyesemento, klinker y asfalt. Awor ta momento pa cambia e prioridadnan y pone e prioridad na progreso y bienestar di e ser humano. MEP tin e vision y mas importante nos ta determina pa hasi esaki, y pa pone e ser humano central bek
Mi deseo pa aña 2017 ta pa nos tur por biba den paz y trankilidad riba nos dushi pais Aruba, caminda e proteccion, cuido y bienestar di e ser humano ta wordo poni central. Cu e FE cu nos Creador lo yuda nos den esaki, nos ta drenta aña 2017 cu optimismo. Felis aña 2017. 

Expresionnan haci den e articulo aki no necesariamente ta refleha opinion di ArenaPoliti.co