Algun siman atras nos a lansa un plan pa desaroya e area di ex Bushiri Hotel y converti esaki den un Boutique Hotel di 5 stea y un hotel di no mas cu 75 camber. Tin hopi discusion na Aruba cu hopi no kier mira mas desaroyo di hotel. MEP ta kere den desaroyonan hotelero pero nos ta kere den desaroyonan unicamente di Boutique hotels y hotelsnan chikito. No manera cu ta e caso actualmente cu AVP caminda no solamente nan a duna permiso pa un aiport hotel di mas di 150 camber sino a compromte nos pais cu mas cu 1500 camber addicional di hotel. Nos no ta kere den desaroyonan di hotelnan grandi pasobra e carrying capacity pa hotelnan asina grandi simplemente no tey. Nos no tin e infrastrcutura pa carga mas capacidad di hotelnan di hopi camber.

Banda di Ex Bushiri Hotel tin un area habri entre Bushiri y Tamarijn y aki nan MEP lo bin cu un desaroyo caminda pueblo lo haya un beach completamente drecha cu tur facilidad. Lo cuminsa pa drecha henter e beach pa asina pueblo por haci uso di e area aki, lo bin cu un parke di recreo pa nos muchanan cu ta haci hopi falta, lo bin un beach soccer court, un beach volley court, un beach tennis court y tambe y beach bar. Banda di esaki lo percura pa tin facilidadnan cu pueblo por haci uso di dje. Nos a bisa cu nos partido no solamente ta senjala cosnan robez riba e pais aki pero tin henter un plan integral con pa saca e pais aki for di e abismo cu AVP a hinka nos pais aden. AVP ta laga atras un pais sin perspectiva, sin futuro pa nos hobenan. Den 8 anja di tempo no a construi scolnan, no a construi facilidadnan deportivo, no a construi casnan social y un gobierno asina no merece confianza mas di pueblo. 

Nos ta garantiza cada votador cu manera cu nos partido drenta gobierno henter e area di Bushiri lo conoce un desaroyo unico caminda henter e communidad lo mira e frutonan di esaki.

Expresionnan haci den e articulo aki no necesariamente ta refleha opinion di ArenaPoliti.co