E decision politico mas impactante di aña 2015
Posiblemente e decision politico mas crucial di aña 2015, ta e aprobacion di e ley di CAft. Por discuti largo riba e pregunta si Gabinete Mike Eman II y e 13 parlamentarionan di Fraccion AVP a tuma e decision corecto den negocia y aproba e ‘creacion’ di College Aruba financieel toezicht. Loke ta sigur ta cu e ley di CAft ta haci’e mas facil pa Hulanda observa, influencia y interveni den nos asuntonan financiero. Di un banda e ta un ‘pildo amargo’ pa guli, considerando cu prome minister Mike Eman na 2014 a declara di no lo entrega ni un centimeter di nos autonomia, y cu e lo muri (di hamber) prome cu e permiti esey pasa. Di otro banda e mesun ‘pildo’ aki a duna Gabinete Mike Eman II un tiki ‘rosea politico’ pa por maniobra y lobby cu Hulanda.
Mientrastanto CAft a duna su consehonan pa loke ta trata e concepto di presupuesto 2016, y a bay di acuerdo pa duna Gabinete Mike Eman II mas tempo pa finalisa e presupuesto (deadline: 31 januari 2016).
Tawata dia 27 di augustus 2015, cu hunto cu Fraccion AVP, prome minister Mike Eman a defende e ley di CAft, y Aruba a conose un ‘areglo’ nobo pa loke ta trata nos autonomia financiero.
Despues cu e ley a wordo aproba, rapidamente mayoria atencion a shift di ‘entrega di autonomia’ pa ‘destruccion na edificio di Parlamento’. Pero cada biaha cu CAft saca un rapport of haci un conferencia di prensa na Aruba, nos ta wordo recorda cu den un of otro forma Aruba tin cu haya “OK” di Gobierno di Reino Hulandes (lesa Gobierno Hulandes), y a sobra menos di ta ‘baas den cas’. Si esaki ta algo positivo of algo negativo, keto bay tin hopi desacuerdo riba dje.
Hunto cu dos articulo di Arubianonan cu a dicidi di contribui na e discusion importante aki,
ArenaPoliti.co a presenta diferente punto di bista riba e tema aki. E articulonan a ricibi hopi reaccion, tanto positivo como negativo. Negativo den sentido di atakenan personal y/of comentarionan cu tin nada di haber cu e discusion, y positivo den sentido di discusionnan sano, cu argumentonan pa defende e diferente opinionnan. Un tema cu lo keda relevante den e añanan nos dilanti.
- Paolo Petrocchi: Pakico ami ta sostene un voto “pro” e ley di CAft (25 augustus 2015)
- Pakico no ta bale la pena pa entrega nos autonomia financiero na Hulanda (26 augustus 2015)
- Cristian Soto Garcia: 'CAFT: Un maldicion of bendicion?' (30 augustus 2015)
Tempo lo mustra si e influencia di CAft lo ‘remedia’ nos situacion financiero, y si e posibel solucion aki lo ta uno temporario of duradero. Klik aki pa lesa/download conseho di CAft, y mas documento relaciona cu CAft.
Resultado di un encuesta inicialmente publica dia 27 di augustus 2015:
Resultado di un encuesta inicialmente publica dia 27 di augustus 2015:
Abo ta vota PRO of CONTRA e ley di CAft?
- Votes: 0%
- Votes: 0%
- Votes: 0%
- Votes: 0%
Expresionnan haci den e articulo aki no necesariamente ta refleha opinion di ArenaPoliti.co