Parlamentario Glenbert Croes (MEP): MEP ta bay pa mayoria absoluto 22 di september proximo
Durante Conferencia di Prensa di Partido MEP, Sr Glenbert Croes a aclarea rumornan cu ta core cu MEP lo tin plan di coalicion cu otro partidonan. Sr Croes ta declara lo siguiente:
“A rais di speculacionnan cu si MEP tin plan di coalicion laga mi ta categorico: MEP no tin plan di coalicion cu niun partido. Alcontrario MEP ta bay pa e mayoria absoluto 22 di september proximo.
Partido MEP sagradamente tey pa sirbi cu un mandato absoluto di nos Pueblo den un Gobierno unicamente cu e signatura di MEP pa e proximo añanan.
E plan di solucion cu lo pone Aruba bek riba pia. Partido MEP ta rigi su mes y e gobierno di MEP cu: rectitud politico, stabilidad politico y conviccion politico.
Partido MEP no mester mete mes cu partidonan cu a lanta pa sigura AVP bolbe bek den Gobierno. Pesey den un forma contundente nos kier expresa: E unico garantia pa AVP no bolbe bek ta vota MEP.
Nos tur di MEP ta trahando duro pa MEP saca e mayoria absoluto di e votonan di nos Pueblo p’sina un Gobierno nobo di MEP no mester tene cuenta cu capricho politico di NIUN otro partido. Nos compromiso y prioridadnan cu urgentemente nos lo duna atencion y accion ta lo siguiente:
- Combati criminalidad cu man duro y asina haci Aruba safe atrobe
- Baha costo di bida: baha prijs di awa, coriente, gasoline y cuminda pa cuminsa
- Inverti den enseñansa
- Mehora drasticamente cuido y atencion medico pa henter nos pueblo
- Baha edad di pensioen di 65 aña pa 62 aña pa cuminsa
- Traha casnan social pa nos pueblo y zorg pa tur famia aki na Aruba haya nan tereno pa nan traha nan cas
- Logra e reapertura y inversionnan den nos refineria cu lo pone San Nicolas y Aruba bek riba pia
Pa logra esaki sin estorbo nos di MEP ta pidi nos Digno Pueblo e mandato absoluto pa bay goberna nos Pais pa e proximo 4 añanan. Loke no ta na discusion mas cu ta cu MEP lo saca e mayoria 22 di september. E discusion ta bay ta con grandi e victoria ta bay ta.
En todo caso victoria di MEP lo ta e victoria di henter nos pueblo. E lo ta dia di husticia pa un pueblo cu no por soporta wordo horcá cu mas medida cu a haci Aruba insoportablemente caro y imposibel pa sobrevivi. Ban hunto p’e cambio...#sin miedo,” sr Glenbert Croes ta bisa.
Expresionnan haci den e articulo aki no necesariamente ta refleha opinion di ArenaPoliti.co