Tur e puntonan cu Comision Nacional ProSiguridad ta urgi Gobierno pa ehecuta
E ‘Marcha Nacional Pa Nos Siguridad’ cu a tuma luga dia 13 di oktober 2016 por wordo considera como un manifestacion exitoso pa diferente motibo. No por bisa ainda cu e marcha a yuda trece un cambio concreto den e maneho di siguridad di Gabinete Mike Eman. Pero pa loke ta trata participacion y e proceso pacifico di e marcha, por considera esaki un exito.
Participacion
E marcha ta entre esunnan mas grandi cu a tuma luga durante e gobernacionnan di Gabinete Mike Eman I y II. Posiblemente esun mas grandi. E marcha a cuminsa na postkantoor den Caya Ernesto Petronia, a sigui pa Hendrikstraat, John G. Emanstraat, Oude Schoolstraat, dilanti warda di polis den Wilhelminastraat y a termina dilanti bestuurskantoor na L.G. Smith blvd. Ta dificil pa duna un cantidad exacto riba e ruta pa motibo cu e manifestacion a crece na caminda, pero ta ‘safe to say’ cu por lo menos 700 pa 1.000 ciudadano a participa na (parti di) e marcha.
Pacifico
E dianan prome cu e manifestacion e organisadornan (Comision Pro Siguridad y Contra di Criminalidad) a pidi esnan cu kier participa pa haci esaki pacificamente y a pidi esnan cu kier causa problema pa no participa. Cu excepcion di algun persona cu na cabamento a grita insultonan na prome minister Mike Eman y minister di Husticia Arthur Dowers, e manifestacion tawata pacifico.
Partido politico
Pa loke ta trata partidonan politico, MEP y PDR activamente a promove e marcha durante conferencianan, entrevista y tambe riba caya. Partido UPP a mustra sosten y a añadi cu un manifestacion no lo ta suficiente. Partido AVP a descurasha participacion di ciudadanonan insinuando e.o. cu ta algo partidista y cu MEP ta duna informacion incorecto di atraconan pa instiga pueblo pa nan manifesta.
E manifestacion a logra mantene un caracter no-partidista cu representacion di diferente sindicato, comerciante, diferente partido politico, Fundacion Lisette Gomes y tambe basta ciudadano cu pa prome biaha a participa den un manifestacion.
Loke Comision Pro Siguridad a urgi Gabinete Mike Eman II pa haci
E manifestacion a produci un ‘Compromiso’ consistiendo di 3 punto cu a wordo firma door di prome minister Mike Eman. Por wak e documento na final di e articulo aki.
Banda di e 3 puntonan aki, Comision Pro Siguridad a presenta un manifiesto cu mas puntonan, incluyendo puntonan specifico pa combati criminalidad y trece mas siguridad:
Inmediatamente
E comision, cu ta di opinion cu e maneho di Gabinete Mike Eman pa combati criminalidad a faya, ta urgi Gobierno pa declara inmediadamente:
- Siguridad y Combatimento di Criminalidad prioridad number uno den maneho di Gobierno.
- Maneho di "ZERO TOLERANCIA" contra di criminalidad y ilegalidad.
- Pa Polis bira visibel, durante henter dia y anochi, como un vigilancia permanente den tur bario na Aruba.
- Re-activa 'Warda Nos Costa'.
- Re-introduci Helikopter.
- Pone Radar den funcion bek.
- Pone e 'scanner' den funcion bek.
- Tene un 'Razia Nacional' pa saca tur arma di candela y arma blanco for di circulacion.
Ta urgi minister di Husticia pa dentro di dos siman presenta un plan concreto cu ta inclui:
- Cuminsa cu un grupo pa studia pa polis y stipula un frequencia defini (p.e. anual) pa e siguiente gruponan cuminsa.
- Entrega na Parlamento un asina yama 'Nota di Cambio' riba e Presupuesto 2017, unda mas fondo ta wordo destina pa e cartera di Husticia.
- Pa Minister di Husticia responde na Parlamento con e ta bay gasta e placa of inverti esaki den e departamentonan concerni.
- Pa minister di Asunto Economico, minister di Husticia y minister di Finanzas atende cu A.P.A. y Astec riba tur cambio di control necesario na tur puerto di carga.
- lnventarisa cua material falta pa cada cuerpo di siguridad por funciona mas optimal y efectivo, sigur na nos wafnan.
- Fortifica un mihor cooperacion entre e cuerponan di siguridad manera Cuerpo di Aduana, I.A.S.A. y Cuerpo Policial.
- Saca tur persona ilegal for di Aruba pa medio di un 'Razia Nacional lntensivo'.
- Pa hasi e departamento di IASA un cuerpo, pa medio di un "instellings besluit" y pasa e unidad di Warda Nos Costa oficialmente bao IASA.
- Pidi asistencia tecnico di 'Koninklijke Marachaussee' pa cu IASA su forma nobo como cuerpo.
- Siguridad Nacional di Aruba mester bira mas activo y bin cu sugerencia y duna entrenamiento of aporta pa duna entrenamiento na e departamentonan di siguridad.
- Aserca "Homeland Security Americano" staciona na Aeropuerto si nan ta disponibel pa duna entrenamiento na imigracion y Douane y KPA.
- Cambia ley pa loke ta referi abuso di menor.
- Haci tur ley, necesario pa cu siguridad di Aruba, mas severo.
Prome reaccionnan di Gabinete Mike Eman
Gabinete Mike Eman no a cumpli cu e punto di anuncia e ‘compromiso’ dilanti miembronan di prensa, pero a opta pa manda un declaracion cortico.
Minister di husticia Arthut Dowers no a firma e ‘compromiso’. Por a nota cu despues di e manifestacion, via su Facebook account a comparti un articulo y tambe un screenshot di detencion di un fotografo y casa di e fotografo. Segun varios fuente e fotografo y su casa a wordo deteni despues di e manifestacion pa motibo di a kibra un wielklem di Aruparking y a (purba di) agredi un miembro di prensa. Sr. Dowers tambe a comparti un video cu imagennan di e detencion y di e manifestacion, cu un jingle di sr. Dowers di eleccion 2013 tocando den e video.
Miembronan di Comision Pro Siguridad a vocifera di lo keda vigilante riba e maneho di siguridad di Gabiente Mike Eman II.
Expresionnan haci den e articulo aki no necesariamente ta refleha opinion di ArenaPoliti.co