E siman aki a habri cu e noticia cu a introduci e “Nationale Gedragscode Onderwijs”(Codigo di Comportacion) pa tur scol aki na Aruba. E codigo aki ta crea claridad pa tur instancia pa loke ta trata e comportacion cu ta acceptabel na scol y ta aplicabel pa mayor, alumnonan, maestro y directivanan di scol.   

Metanan

Importante ta pa concentra riba kico ta acceptabel y kico no y cua ta e derecho y obligacionnan di esnan envolvi den enseñansa. Un di e metanan principal ta pa minimalisa e incidentenan na scolnan  y crea un ambiente positivo y “safe” na tur scol.

Un comision cu ta consisti di 13 stakeholders a reuni pa lunanan largo y awo ta cla cu e producto final pa asina presenta esaki na tur scol aki na Aruba. Segun Parlamentario Kelly ta importante pa tur stakeholders den enseñansa ta riba un liña pa loke ta trata comportacion cu ta aceptabel na scolnan. E Codigo di Comportacion ta encera entre otro proceduranan cu mester cana den cierto situacionnan. E aña aki ainda e informacion lo wordo duna na scolnan y mayornan.

Mocion cu a Sali di Parlamento

Nos por corda cu a sali diferente mocionnan durante reunionnan publico den Parlamento pa asina garantisa tanto seguridad di alumno como maestronan. Parlamentario Kelly ta di opinion cu e Codigo di Comportacion sigur ta cumpli cu e mocion caminda cu a pidi Minister pa percura pa presenta un plan di maneho pa proteha e integridad fisico, mental y social di maestronan di scol den ehecucion di nan funcion. Alabes a pidi Minister pa percura pa un ambiente mas sigur posibel na y rond di tur scol aki na Aruba. Parlamentario Kelly ta aplaudi e introduccion di e Codigo aki y ta spera cu lo por sigui traha pa garantisa seguridad di nos alumno y maestronan.

Expresionnan haci den e articulo aki no necesariamente ta refleha opinion di ArenaPoliti.co