Molester pa comercio ta recompensa cu esfera di calidad mas halto y siguridad pa tur 

ORANJESTAD - Prome zijstraat den centro di ciudad ta cla y aunke esaki a bay cu algun contratiempo, e resultado final ta uno cu tur hende ta di contento cu ne. Comerciantenan sin duda a sinti e retraso cu a keda registra mientras cu Director di DOW a duna di conoce cu nan tin comprension y ta haciendo tur lo posibel pa elimina e retraso. Despues di Hendrikstraat y Middenweg, preparacion t’ey pa sigui cu e otro cayanan.

Tur e cayanan entre L.G. Smith Boulevard y Emanstraat ta bay conoce un mehoracion pa keda riba e mesun liña cu e avance grandi haci den Caya G.F. Betico Croes.  E trabounan di embeyecimento ta forma parti di e renobacion di henter centro di ciudad di parti di Gabinete Mike Eman I y II pa revitalisa e areanan urbano incentivando actividad comercial y contacto social.

Diomar Serrano Caicedo, un peaton den Hendrikstraat a expresa su satisfaccion: “Laga nan sigui drecha tur cos hopi bunita. Loke Gobierno ta haci, nan sa pakico nan ta hacie.” Di otro banda, bo ta haya e propietario y trahadonan di e sector cu ta bisa cu aunke nan mester a pasa den incomodidad pa mas tempo di loke a kere, “Positivo ta cu e ta bay keda hopi bunita; hendenan ta ripara e diferencia, trafico ta pasa miho y autonan no ta bay parkeer malo. Esey ta bon!,” Baby Becerra, un trahado den tienda a bisa.

Comerciantenan ta varia den e enfasis cu ta pone riba e molester, bayendo di argumentonan valido manera fluho di cliente te na situacionnan normal den cualkier trabou di construccion, manera stof. Jamerson Contreras, un comerciante ya pa varios aña den Hendrikstraat: “E ta bay poco poco, pero e ta mustra algo cu ta bay keda nechi. Tin biaha ja… como comerciante bo ta keha paso e ta dal bo un tiki, pero di otro banda bo mester compronde cu e ta yuda e imagen di Aruba cu ta bay atrae mas clientela y mustra mas nechi.”

Ing. Marlon Croes, director di Departamento di Obranan Publico, a señala cu despues cu a cuminsa cu e trabounan dia 14 di januari, temporada di Carnaval y e rol grandi cu DOW ta hunga den esaki, tabata un di e motibonan di e retraso mas grandi. T’asina cu ta e mesun DOW ta haci ambos tarea y esey a ripiti algun dia atras cu e actividad rond di bishita di Rey.

Otro comerciantenan ta consciente cu e sacrificio di algun siman ta a cambio di añanan di bienestar den futuro. Yuleika Vingal-Wardenaar, kende tin un boutique den e becindario: “E ta algo hopi positivo tambe, vooral pa turista cu por yega na un caminda cu nan ta sinti agradabel cu no ta kibra of mahos. Awo ta agradabel pa cana den e caya.”

Por ultimo, Ing. Croes ta desea pa un y tur sa cu DOW ta al tanto y ta haciendo su maximo esfuerso. “Tur proyecto por sufri retraso y tin su molester, pero ora bo caba bo ta yega na un nivel mas halto y ta positivo pa tur hende. Nos tin comprension y mi ta spera nos tin comprension di e comerciantenan cu promesa cu nos ta haci nos empeño, no pa e comerciantenan so, pero pa e comunidad en general.”

Expresionnan haci den e articulo aki no necesariamente ta refleha opinion di ArenaPoliti.co