ORANJESTAD – Diabierna mainta Gabinete Mike Eman II a presenta e Preffered Bidder pa loke ta e proyecto Watty Vos Boulevard. Ta e di dos proyecto PPP cu Aruba ta bay ehecuta y un di e cuater proyectonan grandi di Infrastructura pa nos isla, banda di renobacion di Hospital, Green Corridor y Waf nobo di container. E Preferred Bidder, despues di un proceso riguroso, a bira Mota-Engil, un compania multinacional di gran reputacion y experiencia di origen Portugues.

E grupo empresarial multinacional tin 68 aña di existencia y ta figura entre e 30 companianan mas importante na Europa pa loke ta trata sector di construccion. E ta responsabel pa proyectonan na 22 pais reparti den Europa, Africa y Latinoamerica. Presente na e encuentro cu prensa tabata sr. Nuno Figueiredo den su calidad di representante pa Colombia y Mercadonan Nobo pa Mota-Engil, kende a lidera un delegacion cu durante e dianan aki ta sigui sinta cu ehecutivonan di Departamento di Obranan Publico (DOW) riba e siguiente fase di e proceso cu ta e Financial Closing.

Pa esaki, director di DOW, Ing. Marlon Croes a duna di conoce cu awo cu e tramitenan di Green Corridor tras di lomba y cu banconan mundial a conoce e manera transparente y diligente cu Aruba ta maneha proyectonan PPP, ta facilita e caminda pa yega na e acuerdo pa financiamento. “E ta duna un confianza den pais Aruba. Aworakinan lo tin un competencia pa financia Mota-Engil den e proyecto aki.”

Segun e titular di Infrastructura, e Ringweg of Watty Vos Boulevard ta un proyecto importante paso e ta conecta cu tur otro proyecto andando. Un ehempel di esaki ta mudamento di container di waf pa Barcadera ya cu 70% di e containernan cu ta yega Aruba ta destina pa area di Noord. Di e forma ey, henter e fluho ey ta yega su destino via e Watty Vos Boulevard, aliviando e trafico den centro di ciudad, specialmente L.G. Smith Boulevard.

Watty Vos Boulevard ta bay comberti den un arteria vial importante pa nos isla. Ambos partido ta vislumbra cu pa prome cu fin di 2015 ta keda cla cu e fase Financial Closing y despues di esey, Mota Engil a duna di conoce cu e ehecucion ta tuma un periodo di dos aña. Mescos cu Green Corridor, e compania constructor ta keda responsabel pa mantencion di e obranan pa un periodo di 20 aña.

Expresionnan haci den e articulo aki no necesariamente ta refleha opinion di ArenaPoliti.co