ORANJESTAD – E tres partidonan cu ta forma e consorcio tras di e realisacion di e Green Corridor, esta Pais Aruba, ODINSA y Duitse Bank, a yega na e punto cu documentonan necesario ta cla y a wordo firma. Minister di Infrastructura Benny Sevinger a firma den presencia di Vice Prome Minister Mike de Meza como testigo. “E ta un momento hopi importante no solamente pa e desaroyo di e proyecto, pero pa pais Aruba,” asina Minister Sevinger a expresa.

E mandatario a relata cu Gabinete Mike Eman I for di prome dia a pone como prioridad e proyecto di Green Corridor hunto cu Expansion di Hospital, Ringweg 3 y Waf nobo na Barcadera no solamente paso nan tin mas cu 30 aña, pero paso e cuater proyecto aki ta cambia henter e panorama na Aruba den diferente sentido. E titular di Infrastructura a referi na e aspecto economico, aspecto social y tambe di siguridad y fluho di trafico na Aruba.

E caminda no tabata facil, pero Gobierno a sinti cu mas cu nan deber, tabata un responsabilidad pa finalmente Aruba haya e infrastructura cu ta na par cu e necesidadnan di su poblacion. “Nos a debati hopi cu oposicion pa nan por realisa kico e proyecto aki ta trece pa pariba di brug,” Minister Sevinger a indica.

Minister di Infrastructura a menciona cu economicamente ta trece oportunidad pa diferente compania bin establece na San Nicolas, por ehempel hotel y otro empresanan; e cambio drastico den calidad di bida pa e trahado cu ta biba na San Nicolas y ta traha na Playa of Noord. Por ultimo, tin e cantidad di accidente fatal cu a conoce riba e caminda aki y cu, cu e Green Corridor ta baha drasticamente.

Adicionalmente, tur bario ta haya un mehoracion pa medio di acera, luz publico cu muchanan por hunga safe pafo paso e plan ta inclui tambe parke y fietspad. Despues di a construi e rotonde na aeropuerto for di unda e Green Corridor ta cuminsa, y e caya cu ta bin for di Barcadera pa conecta cu e Watty Vos Boulevard, awo e parti grandi mes ta bay cuminsa.

Pa mesun motibo, ya ta pidi cooperacion y pasenshi di parti di pueblo di Aruba. Trabounan riba e caminda principal di Oranjestad pa San Nicolas ta representa cambionan di ruta pa desvia e trafico. Esakinan lo bay, via Santa Cruz, entre otro. Na final, “Aruba ta bay tin un desaroyo cu tur hende lo ta orguyoso di dje,” asina Minister Benny Sevinger dunando henter pueblo di San Nicolas y tur otro bisindarionan pariba di brug, masha pabien! 

Expresionnan haci den e articulo aki no necesariamente ta refleha opinion di ArenaPoliti.co