Trabounan fisico ta cuminsa aki un luna 

ORANJESTAD – Diahuebs merdia tabata un momento importante den e historia di nos isla y particularmente pa e pueblo di pariba di brug. Den sala di reunion di Bestuurskantoor a firma e acuerdo entre Pais Aruba y ODINSA pa cu construccion di e Green Corridor. “Nos ta contento cu nos a yega e momento aki cu a firma pa e proyecto aki por fin bira un realidad despues di 30 aña,” asina Minister Sevinger a duna di conoce cu gran orguyo. Hunto cu expansion di hospital, mudamento di waf di carga y ringweg, Gabinete Mike Eman ta considera e proyecto aki un deber cu a cumpli responsablemente cu pueblo di Aruba.

E firmamento ta marca e punto final na un proceso cu a cuminsa cuater aña pasa acudiendo na e diferente departamento y instancianan pa su debido consideracion, plan y diseño, legalisacion y ehecucion. A tene cuenta cu tur aspecto rond di e proyecto y e partidonan envolvi. Director di DOW, Ing. Marlon Croes a splica e motibo di tanto firma. “Tur e documentonan aki ta parti integral di e contract pa garantisa e banco y Pais Aruba como ‘opdrachtgever’ cu e contratista ta bay haci nan trabou segun palabra.”

Mr. Paul D. Langerak, Hurista y Hefe di Maneho & Supervision di Departamento di Obranan Publico, DOW, a prepara y supervisa e documentonan prome cu a entrega esakinan na Minister di Desaroyo Teritorial, Infrastructura y Integracion, Oslin Benny Sevinger pa firma y na Minister Asunto Economico, Comunicacion, Energia y Medio Ambiente pa paraaf como testigo.

Director di DOW a indica cu pa fin di e luna aki, no mas tarda cu comienso di augustus, e trabounan fisico riba e caminda ta bay cuminsa. Riba e punto aki mes, Minister Sevinger ya ta haci apelacion riba automobilistanan. “Pa dos aña y mey ta bay tin caminda lo tin cambio di ruta; nos ta pidi pasenshi na pueblo di Aruba paso na final ta bay tin un desaroyo cu tur hende lo ta orguyoso di dje.”

Expresionnan haci den e articulo aki no necesariamente ta refleha opinion di ArenaPoliti.co