ORANJESTAD – Green Corridor no solamente ta trece un cambio den e calidad di bida di e ciudadano di Aruba, pero e ta crea mas cupo di trabou y tambe ta trece mas siguridad. Esaki ta loke cu Minister Benny Sevinger a trece dilanti den un conferencia di prensa dialuna mainta.

E mandatario a splica e dos aspectonan mas importante cu e ta mira den Green Corridor: cu ta eleva calidad di bida di e ciudadanonan y ta trece mas siguridad. E ta kere cu accidentenan pisa manera cu nos conoce riba e caminda grandi di San Nicolas pa Playa, ta bira hopi menos. Esaki principalmente pasobra na momento di pasa auto no ta topa directamente cu trafico di direccion contrario. “Esaki sigur no por pone un prijs riba dje,” el a duna di conoce.

Otro cos cu Sevinger ta kere cu no por pone un prijs riba dje ta e calidad di bida di ciudadanonan cu ta pasa hopi tempo den filanan di auto pa bay traha mainta y atardi ora di bay cas. E tempo di biahe aki ta bay baha y cada minuut cu nan spaar, cu nan por comparti cu nan famia, cu ta algo impagabel. Ademas, el a bisa, proyectonan di e magnitud aki ta paga nan mes. “Hopi biaha tin discusionnan con ta paga, pero e proyectonan aki ta paga nan mes, debi na e desaroyo economico cu nan ta trece cu nan. Cada florin cu nos inverti den e proyecto aki, nos ta haya un 1 florin cu 60 cent  bek den “return investment” pa pais Aruba. Pues nan ta paga pa nan mes a lo largo pa e desaroyo cu nan ta trece,” Sevinger a bisa.

Tur e partidonan envolvi den Green Corridor ta na Aruba e siman aki y Minister Sevinger y su Team ta preparando un encuentro cu e partidonan pa splica mas riba e proyectonan y e impacto di nan riba desaroyo di e pais. E mandatario tabatin palabranan di elogio pa su team pero tambe pa Prome Minister Mike Eman, kende tur siman tabata pusha pa e proyecto avansa, despues cu e tabatin mas di 30 aña den lachi di mesa drumi pa wordo ehecuta. 

Expresionnan haci den e articulo aki no necesariamente ta refleha opinion di ArenaPoliti.co