Green Corridor ta cla pa cuminsa 

ORANJESTAD – E siman aki Minister di Infrastructura Benny Sevinger a biaha pa New York pa un compromiso cardinal pa futuro di Aruba. Ta trata di e firma di documentonan cu banco y compania constructor pa cu realisacion di Green Corridor. Entre ehecutivonan y representantenan di gobierno, e titular di Infrastructura a enfatisa un biaha mas e importancia transcendental cu e proyecto aki tin pa henter nos isla, pero specialmente pa tur e barionan pariba di brug. “Pueblo ta wardando pa e proyecto aki paso nan sa cu e ta bay cambia nan bida; y pesey nos ta haci’e pa duna un miho bida na nos pueblo,” asina Minister Sevinger a bisa na tur esnan presente na e firma.

Di rotonde di aeropuerto te San Nicolas ta bay conoce e prosperidad den bario y den comercio cu area Noord di e isla ta gosa di dje pa ultimo 30 aña. Esaki ta hustamente loke Gabinete Mike Eman I y II tabata kier a logra for di inicio. Durante ultimo añanan ta preparando San Nicolas su barionan, su scolnan, su facilidadnan deportivo, caya y beachnan y te hasta stimula su economia cu incentivonan fiscal. Awo ta bin un di e partinan mas importante, cu ta e caminda cu ta conecta pariba cu e resto di e isla.

“Bo tabatin tres aspecto cardinal pakico e proyecto aki mester a bin; y no awo, pero 10 pa 15 aña pasa,” asina Minister Sevinger a splica. E prome cu el a menciona ta e motibo economico paso si kier duna San Nicolas en berdad e oportunidad pa desaroya economicamente riba tur tereno, e ta un ‘must’ pa e proyecto aki bin. Waf nobo na Barcadera ta strategicamente ubica mey di Oranjestad y San Nicolas premirando cu den un futuro cercano, hopi di e importacion lo ta destina pa bay pariba di brug.

Pa loke ta toca e parti social, Minister Sevinger a bisa cu si kier duna San Nicolas un realce social y un miho calidad di bida pa tur su ciudadanonan, tur bario mester conoce un mehoracion di su ambiente, un sinti di balor y nan conexion cu e Green Corridor ta logra esaki. No ta construi djis cuater liña di asfalt, pero tambe henter un embeyecemento cu luganan pa recrea y socialisa, caminda muchanan por hunga trankil y hendenan por haci movecion sanamente.

Siguridad ta e di tres factor. “Cuanto hende a perde nan bida riba e caminda aki,” Minister Sevinger a puntra retoricamente algun tempo atras. Construccion di rotonde dilanti di aeropuerto a baha drasticamente e cantidad di accidente. Awo cu ta bay tin cuater via y autonan no mester bay otro banda pa pasa auto, trafico lo ta mas sigur. E fluho lo mehora considerablemente aliviando stress di e shen di automobilista cu ta transita tur dia entre nan cas y trabou.

“E tres puntonan ey no por warda pa otro 20 of 30 aña mas. E gobierno aki a dicidi na 2010 cu ta bay p’e,” asina Minister Sevinger a duna di conoce. Cu firma di e contract pa e proyecto fisicamente cuminsa cu e di tres parti pasobra a haci rotonde caba y e conexion entre Barcadera cu Green Corridor y awo e Green Corridor mes ta bay cuminsa.

Gabinete Mike Eman II ta felicita pueblo di Aruba, en special pueblo di pariba di brug cu e firma pa realisacion di e proyecto aki. No solamente ta representa creacion di hopi cupo di trabou durante su construccion, pero tambe un evolucion grandi y positivo. P’esey semper e gobierno aki tabata 100% para tras di e proyecto aki cu mester a bin for di hopi aña caba.

Expresionnan haci den e articulo aki no necesariamente ta refleha opinion di ArenaPoliti.co