Green Corridor ta un di e prome proyectonan PPP pa un isla chikito den Caribe  

ORANJESTAD – Un biaha mas Aruba ta cana den delantera den nos region birando e prome isla chikito den region di Caribe pa inicia un proyecto grandi di tipo PPP (Private Public Partnership). Construccion di Green Corridor no solamente ta trece desaroyonan masha positivo den diferente aspecto, pero tambe ta haci di Aruba un ehempel di vision y maneho publico. Tanto Nacionnan Uni como islanan ruman, ta wak nos di cerca pa proximamente copia e formula aki. Firma di e contract entre e partidonan envolvi a tuma luga e siman aki na New York.

Presente na e oficina di abogado na Manhattan pa e firma tabata representantenan di Gobierno di Aruba den persona di Minister di Infrastructura Benny Sevinger y Director di Departamento di Obranan Publico Ing. Marlon Croes. Ehecutivonan di ODINSA, Deutsche Bank y PriceWatercoopers tambe a forma parti di e momento historico aki. Prome Minister Mike Eman tabatin un deseo enorme di por a presencia e firma importante, pero debi na mal tempo na New York, su vuelo proveniente di Toronto no por a yega na tempo.

E titular di Infrastructura a comunica na esnan presente e grado halto di importancia cu e firma aki tin pa pueblo di Aruba. Tambe a splica di e vision di Gabinete Mike Eman I y II pa cu esaki y cu ta a base di conseho di expertonan Hulandes a yega na e decision pa haci’e den un sistema di PPP. “Na Hulanda nan ta haci’e asina y ora cu PriceWaterhouseCoopers a bin acerca, nos a cuminsa wak con ta hinca tur cos den otro,” Minister Sevinger a bisa.

El a comenta tambe cu no tabata un caminda facil. E idea a genera hopi debate den Parlamento pa asina pasa e ley cu ta dun’e autorisacion pa firma un contract pa mas cu cinco aña. Despues di esey, a tene un encuentro di informacion pa esnan interesa den su ehecucion y por a tuma nota di e atencion enorme cu a haya for di varios compania grandi di diferente parti di mundo.

“Esaki ta djis e comienso,” e Minister di Infrastructura a bisa, contando cu a presenta e proyecto aki na Nacionnan Uni y e reaccion cu a haya for di otro nacionnan Caribense. “Nan tur ta wak di cerca con cosnan ta cana aki pasobra nan ta den un posicion similar. Nan ta paisnan chikito cu tin mester di uni forsa cu corporacionnan pa realisa proyectonan grandi.” Tambe a menciona cu Nacionnan Uni kier promove e tipo di proyectonan PPP caminda no solamente ta drecha un caminda, pero ta desaroya henter un area di un manera sostenibel pa mehoracion social y economico.

Minister Sevinger a expresa cu ta un experiencia excelente pa tur esnan envolvi. “Pueblo ta wardando pa e proyecto aki paso nan sa cu e ta bay cambia nan bida. Pesey nos ta haci’e tambe, pa un miho bida pa nos hendenan.” Finalmente e mandatario a indica cu esaki ta e comienso di un relacion riba termino largo cu ODINSA y Deutsche Bank y cu e momento a yega pa cuminsa construi.”

Expresionnan haci den e articulo aki no necesariamente ta refleha opinion di ArenaPoliti.co