Producto Aruba ta sigura riba termino largo 
Awo cu aprobacion di Green Corridor tur 4 ta den realisacion 

ORANJESTAD – E firma entre Gobierno, ODINSA, Deutsche Bank y PriceWaterhouseCoopers na New York e siman aki ta representa e inicio di e prome proyecto tipo PPP pa Aruba. E ehecucion di Green Corridor ta un di cuater proyecto cu pais Aruba tabatin mas cu 30 aña ta warda riba dje y Gabinete Mike Eman ta ehecutando. Cada un ta percura pa avancenan social y economico grandi pa nos pais y e garantia cu producto Aruba ta keda fuerte den e mercado turistico.

Na momento cu a drenta den Gobierno, Gabinete Mike Eman I a haya un situacion economico precario. No tabatin crecemento economico; al contrario, Aruba tabatin un caida economico di 5%. “Esey kier men cu bo pais no ta bayendo dilanti y e oportunidad pa bo hendenan haya extra entrada no tabatey,” Minister Sevinger a splica. “Nos a haya un situacion cu un inflacion caminda Florin a bay atras cu 22%, mundo tabata den un crisis, pero Aruba dobel dor di e efectonan cu refineria a cera. Esey tabata e start di e gobierno aki.”

Segun e Minister, ta masha facil pa oposicion bisa awor cu mester a tuma medida, pero esey no tabata e posicion adecua. Gabinete Mike Eman I y awo II a wak cu tabatin un necesidad pa stimula nos economia, y den esey, a haci un plan di tur proyecto cu por tin un influencia ria nos economia riba termino corto.

“Rapidamente pone hendenan na trabou, construccion a cuminsa, a busca fondonan di FDA, a stimula trabou mehorando producto Aruba, a drecha Caya Grandi, drecha San Nicolas y barionan. Asina a stimula trabou y crea entrada. “Un bes cu tin entrada, hendenan tin oportunidad di haci compras y asina entrada di gobierno ta crece. Esey tabata e meta grandi,” e titular di Infrastructura a splica.

Den e meta ey a haya cuater proyecto cu bou di tur gobierno tabata un debate. Un a haci mas cu e otro na dje, pero nada concreto a bin dilanti. “Bo no por keda debati, pero no bin cu un solucion,” e mandatario ta di opinion. Green Corridor ta un di nan hunto cu Watty Vos Boulevard, Expansion di Hospital y Waf Nobo. “Dia cu Hospital a wordo traha, mescos cu e caminda pa San Nicolas, ta tempo cu Aruba tabatin 50 mil habitante; awe nos ta un poblacion di 110 mil hende, dus casi dobel. Kier men bo no por keda cu e mesun infrastructura, Minister Sevinger a bisa.”

Na 2009 a forma un ekipo di experto local e internacional pa haci un inventario di e situacion y a traha un lista di prioridad. Asina a cuminsa drecha, un pa un, e edificionan publico. A sinta cu tur departamento manera DOW, DIP, SERLIMAR y a bisa cu mester traha riba un Master Plan. Esaki a haci hunto cu profesionalnan riba tereno di arkitectura, economista, desaroyo urbano.

Fuera di esey, Gabinete Mike Eman a tene reunionnan cu stakeholders manera e propio hendenan di e bario y un bes cu e plan tabata cla, a forma un ekipo pa ehecuta esaki. Sin esey, lo a bira djis manera otro gobierno anterior caminda plan ta bin y plan ta bay, pero no ta yega na resultado.

E InfraTeam ta consisti di expertonan cu experiencia grandi riba tereno con gobierno ta traha y con proyectonan ta ehecuta. Riba dje Minister President Eman ta sinta un bes pa siman pa pasa over di e proyectonan y stipula termino pa cada proyecto, kico por topa cu ne como retonan y premira nan solucion, ta categorisa proyectonan chikito y grandi y con e tema ta duna sosten na cada responsabel.

“Durante ultimo cinco aña a bin ta traha. Cada proyecto tin su reto, mas cu claro; algun mas grandi cu otro, pero sea chikito of grandi pero ta soluciona nan. Si wak cuanto proyecto a realisa y cuanto mas tin riba lista, bo tin cu bisa cu pais Aruba tin un diferencia grandi entre 2009 ora cu a drenta gobierno; un diferencia entre e pais cu a haya y uno cu ta preparando su mes fuertemente pa futuro,” asina Minister Sevinger a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co