Concepto di contract cu CIC N.V. ta aproba 

ORANJESTAD – Minister di Infrastructura Benny Sevinger a presenta na e reunion publico pidi dor di Parlamento di Aruba pa trata e concepto di contract pa cu realisacion di e proyecto Green Corridor. Manera e ley pasa na 2011 ta stipula, e instancia legislativo tin e derecho di yama e Minister encarga cada bes cu e haya esaki necesario. Esaki ta algo cu e titular di infrastructura no tin ningun obhecion pa haci. Na mas di un ocasion Minister Sevinger a manifesta cu tin transparencia den e proceso y tin pleno confianza den tur cu ta forma parti di e proyecto. Despues di a contesta tur pregunta, Parlamento a aproba e documento pa asina e por wordo firma.

E preguntanan cu a bin dilanti a cubri un cantidad amplo di topico cu a bay for di conseho duna pa instancianan local te na e proyecto su prijs y financiamento. Cada un, Minister Benny Sevinger a contesta meticulosamente te cu na e punto cu, den e di dos ronde apenas tabatin un par di pregunta mas pa e Parlamentarionan haya aclariacio riba nan.

“Green Corridor lo tin mes desaroyo economico positivo pa tur e barionan pariba di brug cu Sasaki tabatin pa area di Noord,” asina Minister di Infrastructura a bisa den Parlamento. Na esaki a argumento cu e ‘Return On Investment’ ta un siguridad, manera Nacionnan Uni mes ta bisa cu pa cada Florin cu wordo inverti den infrastructura, ta haya 1.3 bek.

Den su disertacion Minister Sevinger a splica cu mientras oposicion ta papia di un pura di parti di Gobierno pa ehecuta e Green Corridor, Gabinete Mike Eman I y II ta hustamente trahando duro pa concreta e proyecto aki y otronan cu tin mas cu 30 aña riba lista di necesidadnan pa nos pais. “Claro cu tin un pura, paso si nos no hacie aworaki, ta te ki dia mester warda?” e titular di Infrastructura a puntra na e sala.

A bari tambe for di mesa e ponencianan di MEP cu ta bisa cu e proyecto aki ta bay costa Aruba mas di 700 miyon Florin. Na 2011 Parlamento a aproba un plafond di 292 miyon Florin y esey ta loke ta bay paga bek. Tin diferente instrumento inclui den tur contract y documento pa garantisa esey. Si pa un motibo fuera di alcance, e proyecto ta costa mas, anto e Minister no por tuma e decision aki riba su mes, pero mester di aprobacion di Parlamento.

Otro di e puntonan treci dilanti tabata e conseho huridico y financiero necesario pa un proyecto di e magnitud aki. Minister Sevinger a mustra cu, ademas di e rapport traha pa expertonan internacional di desaroyo urbano riba e impacto riba medio ambiente,  e proyecto di Green Corridor a cana su caminda legal, incluyendo na departamento di Juridische Zaken y tambe na Directie Financien. Mas leuainda, no tin mester di busca conseho di Raad van Advies pasobra Gobierno no ta haciendo un peticion pa placa of cambio den ley.

E suma inicial cu e compania encarga mester pa cuminsa cu e trabounan, e ta reuni entre 35 miyon di su mesun capital y 100 miyon cu Duitse Bank ta bay fia na ODINSA como consorcio bou di cual e compania Caribbean Infrastructure Company N.V. ta bay opera na Aruba. Di e manera aki ta cumpli cu nos ley y exigencianan. Especificacionnan di e compania aki ta informacion publico y accesibel na tur cu ta desea. Su unico obhetivo ta pa diseña, financia, ehecuta, mantene y presta servicio na e proyecto Green Corridor segun indicacionnan duna dor di Pais Aruba.

E practica aki ta uno masha normal di parti di ODINSA y custumber na hopi pais pa garantisa e sostenibilidad individual di cada proyecto. Actualmente ODINSA tin obranan similar andando na Colombia, Chile y Peru.

Green Corridor ta trece siguridad evitando accidente paso autonan cu kier pasa otro no ta bay riba e otro banda di caminda; ta crea un miho fluho di trafico loke ta duna e ciudadanonan mas tempo pa comparti cu famia na cas; ta percura pa un embeyecemento total di tur e barionan for di rotonde di aeropuerto te San Nicolas pa medio di fietspad, parke, etc.; y tambe ta brinda oportunidad pa desaroyo di economia danki na un miho acceso. Cada aña ta bay pa paga 16.2 miyon Florin cu ta inclui su mantencion di henter e proyecto.

Expresionnan haci den e articulo aki no necesariamente ta refleha opinion di ArenaPoliti.co