NEW YORK- Un discurso riba seguridad di SIDS (Small Islands Developing States) dilanti Conseho di Seguridad di Nacionnan Uni cu ta e organo mas halto di e organisacion aki, ta un honor indiscutibel cu a toca Prome Minister di Aruba Mike Eman. El a haci esaki den representacion di Reino Hulandes. Banda di e discurso aki Eman a papia hunto cu otronan tambe riba e tema ‘Green Economy’ y a tene reunionnan bilateral cu varios miembro di e Conseho di Seguridad di Nacionnan Uni. Den su discurso Eman a menciona e riesgo y retonan cu SIDS’nan ta haya nan confronta cu nan. Peliger di cambio di clima, di crimen transnacional den nan awanan y di e menaza cu di piscamento den forma ilicito, loke ta forma un peliger pa e bida den SIDS. Tur tres temanan cu mester wordo atendi riba e platafroma mas halto cu tin pa asina segura bida den SIDS.

Despues di a papia riba e reto y peligernan aki Prome Minister Eman a splica loke Reino Hulandes ta haciendo pa yuda pa e mundo ta un miho lugar, pa tin paz, husticia y desaroyo den SIDS. El a trece algun ehempel dilanti. Asina Reino ta bringa pirateria den e awanan di Seychellen. Na Grenada Reino a start cu un operacion conhunto pa loke ta crecemento blou - cu ta encera bida maritimo sostenibel- y seguridad di alimento. Despues di horcan Pan, Reino tabata entre un di e promenan pa brinda asistencia na Vanuatu y Kiribati.

Aruba y Reino Hulandes hunto cu Carbon War Room y TNO ta asercando 10 otro isla den Caribe pa comparti cu nan experiencianan riba e caminda cu Aruba ta canando pa logra di ta 100% sostenibel riba tereno di energia.

Prome Minister Eman: “Concluyendo, Reino Hulandes ta agradecido cu e interes den SIDS di e Conseho di Seguridad di Nacionnan Uni y e retonan cu nos ta confronta. Colaboracion mas fuerte regional y internacional ta necesario pa nos por enfrenta e retonan riba seguridad cu nos ta encontra den Caribe y otro region unda tin SIDS.”

“Esaki ta tambe un di e motibonan pakico Hulanda ta un candidato pa tin un asiento den e Conseho di Seguridad den Nacionnan Uni pa e periodo 2017-2018. Nos tur conoce nos retonan y nos tin e interes di paisnan chikito y mediano cerca di nos curazon. Nos ta habri pa discusionnan mas aleu encuanto e retonan internacional cu ta afecta SIDS, awor y den futuro cu un bista cu ta enforsa solidaridad entre miembronan ‘grandi y menos grandi’ di e famia di Nacionnan Uni.

Den un forma metaforico Eman a bisa e miembronan di e Conseho di Seguridad di Nacionnan Uni cu Aruba a lanta den e neishi di 6 SIDS (Small Island Developing States). Ora nos pensa riba nos rumannan chikito Bonaire, Saba y Sint Eustatius, nos ta sinti compasion, un sentido di solidaridad y responsabilidad pa nan. Asina paisnan grandi, institucionnan y hasta corporacionnan grandi mester sinti pa islanan chikito cu ta estadonan den desaroyo, Esaki cu e pensamento “Mi ta e guardian di mi rumannan”.

Cu e bunita proverbio aki Eman a conclui su discurso pa cual el a haya bon acogida. E embahador Mericano David Pressman, representante pa Nacionnan Uni pa Asuntonan Politico Special, a menciona Aruba den su discurso bisando cu e isla ta haciendo un bon trabou riba tereno di sostenibilidad pa logra independencia di petroleo na 2020.

Expresionnan haci den e articulo aki no necesariamente ta refleha opinion di ArenaPoliti.co