ORANJESTAD – Awe ta yega abordo di e barco Viking Eagle for di Miami, e di tres streetcar cu lo transita den e ruta for di waf di Oranjestad pa Caya G.F. Betico Croes. E streetcar color oraño ta forma parti di e plan manera a keda presenta originalmente, dus no ta un compra adicional, ni tampoco ta representa gastonan extra pa caha di Gobierno di Aruba.

For di un principio, e plan Renobacion Oranjestad a papia di un sistema di tram pa transporta turistanan for di area di waf di crucero, dor di henter caya principal y te na su ultimo tiendanan na Plaza Nikki Habibe y bin bek.

E streetcar tambe ta destina pa trahadonan di tienda y otro establecimentonan den centro di ciudad. Di e manera aki nan por laga nan auto staciona na e parkeerplaats publico y yega pia di trabou lagando espacio pa consumidornan por yega mas cerca di e tienda cu nan kier bishita.

Prome dos streetcar cu a yega Aruba ta cumpra na 2013 y 2014 a sali for di presupuesto di proyecto Renobacion Oranjestad cu a wordo aproba na aña 2010, mientras cu esun cu ta yega awe y e ultimo cu ta yega na luna di october proximo, ta paga cu Fondo Desaroyo Aruba.

Ta bon pa menciona cu tampoco su yegada ta pone cu mester busca of tuma personal adicional. T’asina cu AruTram, ya caba tin e personal asigna pa maneha e streetcars aki. AruTram ta e departamento encarga cu tram y ta maneha dor di e compania estatal Arubus.

E cantidad di tram cu a wordo destina ta basa riba e estadisticanan concreto cu ta indica e number di bishitante cu ta circula den centro di ciudad. Tambe a tene cuenta cu plan di desaroyo di turismo crucero. Durante dos ultimo aña, e dos streetcar den operacion actualmente a transporta un total cu ta surpasa e 350 mil persona.

Pa optimalisa e servicio cu AruTram ta brinda na bishitante y local, ta busca pa reduci e tempo cu personanan ta warda na e diferente stop cu tin riba e ruta. E trayecto di e streetcars ta coordina pa medio di sistema computarisa teniendo na cuenta e ubicacion di cada unidad constantemente.

Expresionnan haci den e articulo aki no necesariamente ta refleha opinion di ArenaPoliti.co