Dia 27 augustus ultimo partido AVP no solamente a entrega autonomia financiero pero a condena pueblo cu mas medida. Esaki ta hasi cu ponencia di AVP cu e ley di CAFT no ta contene medida uno totalmente eroneo y asina ta confirma cu ministernan di Gabinete Eman ta continua na mal informa pueblo! Den e comunicado aki nos ta bai splica pakiko semper tawatin medida bou mando di Gabinete Eman y cu lo tin medida den CAFT tambe!

Na 2014 ora cu e ex minister di finansas a pidi autorisacion pa hasi un buitenlandse lening (prestamo den exterior) e mester a cumpli cu 3 rekisito entre otro 1) entrega di presupuesto 2014 prome cu 1 mei 2014 incluyendo un meerjarenraming unda cu por nota cu pais Aruba lo ta riba e bon caminda pa tin un presupuesto balansa 2) ahustacionnan adicional den presupuesto teniendo rapport di IMF 2013 bou consideracion ( esaki ta incluyendo e proposicion pa un sales tax di 15% ) 3) evaluacion di e presupuesto y meerjarenraming door di un instancia independiente cual ta CFT. For di e tempo aki caba Gabinete Eman a indica cu e ta bai aplica  su propio plan jama " Balanced budget akkoord". Esaki a encera cu gobierno lo a mara su mes na un maximo di 1.350 miyon di gasto anualmente ( durante 4 aña largo) mientras e entradanan di pais Aruba lo tin 1.150 miyon como base cu expectativa pa esaki crece anualmente. Como parti di e plan Gabinete eman II a presenta un total di 24 medida cual ta basa riba 2 categoria 1) medida pa genera entrada y 2) medida pa corta gasto. Adicionalmente e presupuesto 2014 gobierno mester a inclui tambe e calculacionnan multi-anual di añanan 2015 te cu 2018. Remarcabel ta cu nunca e por a cumpli cu esakinan!

Pueblo mester realisa cu for di un promer instante di gobernacion di AVP semper nos por a papia di medida entre otro aumento di edad di pensioen, aumento di prima, individualisacion di AOV, aumento di prima AZV tawata ehempelnan di prome medidanan di AVP.  Cu aprobacion di ley CAFT no solamente bo ta aproba un biaha mas e 24 medida pero bo ta condena pueblo na medidanan adicional pa asina bo por bai keda den e margen maximo di deficit manera e ta poni den articulo 14 di e ley. Den articulo 14 di e CAFT/ Ley supervision Gabinete Eman a compromete su mes cu normanan maximo di deficits cual ta 3.7% (2015), 2.0% (2016) y 0.5%(2017). 

Awor kiko esaki ta nifica? Cu bo tin cu cumpli cune no matter what. Den e ley ta referi cu por aplica consehonan di CFT di 29 december 2014 por ehempel un solidariteitsheffing. Sino bo lo por aumenta belasting brutalmente manera grondbelasting- motorrijtuigenbelasting-inkomstenbelasting- BBO- BAZV, bo por introduci belasting nobo ABB, financial transfer tax of bo por sigui crea cobransanan nobo manera esun di parkeo, extra bijdrage AZV, cobransa di Serlimar. Pero tambe bo por kita tur e contractantnan, bo por corta den tur fundacion, bo por corta den husticia - educacion- salubridad. Esakinan ta entre otro e opcionan cu Gabinete Eman lo bai tin cu scoge di dje. Bottomline un sota di medida contra pueblo esaki lo ta! Nunca ba tende cu nan entrega 10% di nan salario?!, ki dia ba tende Gabinete Eman baha e cantidad di minister di 9 pa 7?, ki di ba tende cu contractnan desproporcional di coordinadornan ta stop?!, Ki dia ba tende contractnan cu marketing companies ta wordo limita?! Ki dia ba tende cu biahenan innecesario ta wordo corta? Ki dia ba tende nan honestidad cu no tin placa pa projecto? Ki dia a sali for di boca di Gabinete Eman cu lo stop malgastamento di placa?! Nada toch? Pero ta dicidi pa continua na caba cu poder di compra y castiga pueblo! 

Un cos ta sigur cu e iresponsabilidad y mal maneho di Gabinete Eman a hiba nos asina leu cu awendia ta existi e ley di CAFT. Sin exclui pueblo no mester lubida nunca cu fraccion di AVP ta co-responsabel pa condena pueblo cu mas medida pasobra e ultimo 6 añanan aki sistematicamente y intencionalmente a demostra cu nan NO a hiba ningun clase di control riba maneho di gobierno. Pesei e ta ironico y incomprendibel cu tur e ministernan di Gabinete Eman incluyendo fraccion di AVP ta papia cu ley di CAFT no ta contene medida. Gabinete Eman y fraccion di AVP debe pueblo un contesta : Si nan no ta medida con bo ta jamanan anto?!

Expresionnan haci den e articulo aki no necesariamente ta refleha opinion di ArenaPoliti.co