ORANJESTAD – Lider di MEP Evelyn Wever-Croes den Conferencia di prensa di MEP semanal, a para keto na e destruccion hasi diahuebs ultimo, dia di e reunion di e ley di CAFT.
“Mi ta lamenta e destruccion ocasiona na e edificio di Parlamento, pero mas aun mi ta lamenta e destruccion causa na nos pueblo, na nos pais, na e honor y dignidad di nos pais. Mi ta ripara cu awor partido AVP kier pone hopi atencion na algun glas kibra di edificio di Parlamento, pero no kier pone atencion na kiko a causa e destruccion ey.
E unico responsabel ta presidente di parlamento cu a permiti e situacion escala di e forma aki, y a chercha cu un asunto asina serio. Pasobra di oranan di trempan el’a wordo pidi pa 5 sindicato pa un audiencia, pa asina nan splica nan punto di bista prome cu votacion; y el’a priminti nan cu e lo scucha nan tambe! Henter dia e presidente di parlamento a tene nan na linea, el’a ganja nan, el’a chercha di nan. 5 sindicato cu a uni pa trese nan preocupacion dilanti, pero presidente di parlamento na forma arogante a scohe pa bira lomba pa nan y no scucha nan.
E arrogancia aki a causa rabia bou esnan cu henter dia a para pafo den solo y calor insoportable, wardando e presidente di parlamento atende cu nan, siquiera scucha nan.
Lamentablemente e presidente di parlamento a scohe pa sconde pa e hendennan aki, y na momento cu e votacion a pasa y ela bisa cu e lo scucha nan, ta momento cu tur cos a sali for di man pafo di edificio di Parlamento. Ta claramente cu ta e actitud indiferente y arogante di Marisol Lopez-Tromp a ocasiona cu cosnan a sali for di man.Ami a purba conbense na varios ocasion pa siquiera scucha e sindicatonan, pasobra ningun hende ta perde nada pa djis scucha pueblo, pero e no tabata kier. Awor e mester asumi su responsabilidad y realisa cu el’a faya!”, segun lider di MEP.

“Contrario na un grupo chikito di politico cu a scohe pa repara e danjo hasi na algun glas kibra, nos di MEP ta scohe pa traha na repara e danjo mas profundo hasi na honor y dignidad di nos pais, e danjo ocasiona pa un gobierno cu a regala nos libertad. Nos lo traha pa drecha e danjo hasi na pueblo pasobra Parlamento tambe a bira lomba pa pueblo. Pueblo ta den sufrimento den desesperacion, y no ta na su lugar pa e presidente di parlamento tene pueblo na linea y ora cu reunion a caba e ora bisa cu bo ta bai scucha nan. Esey ta un falta di respet.

Mike Eman tambe ta falta respet di pueblo, bisando cu djis drecha algun glas kibra ta soluciona e problema. Mike Eman sa cu e no tin sosten di pueblo, e no tin sosten di gremio y e no tin sosten di sindicato mas. Ta un falta di respet di pretende cu e glasnan kibra ta mas importante cu e traicion na pueblo y e promesa di mas medida. Diahuebs 27 augustus 2015 ta bai den historia como un diahuebs hopi scur, pasobra e gobierno y e parlamento a bira lomba pa pueblo, y pueblo lo sa di tene nan cada un responsabel pa nan actonan.
Mi ta bolbe pidi tur hende keda calmo. Mi ta comprende e dolor y desesperacion cu ta reina, pero no tuma husticia den bo propio man. Tin un Dios y nos Dios ta husto. Dios no ta drumi y Dios lo sa di duna nos nos libertad bek”, Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co