Art 23 CAFT: E mester di aprobacion di Hulanda prome 

ORANJESTAD – Lider di MEP Evelyn Wever-Croes den Conferencia di prensa di MEP semanal, a reacciona riba e ponencia di politiconan di AVP cu e ley di CAFT no tin entrega di autonomia.
“Esnan cu ta sigi bisa esey ta pasobra ainda nan no a lesa e ley bon. Berdad e ley ta complica, pero e ta un ley cu ta contene cantidad di sanccion. Si presupuesto wordo entrega laat, bo por haya un KB, si cuenta anual wordo entrega laat, bo por haya un KB, si bo no controla empresanan di gobierno, bo por haya un KB, si durante anja bo mester mas medida, y bo no bin cu nan, bo por haya un KB. Asina tin cantidad di menasa pa KB. Lo mas ironico ta cu mayoria di e exigencianan menciona ya caba ta menciona den nos ley di Contabilidad, pero no tin sanccion. Hulanda awor den e ley di CAFT a introdusi sanccionnan. E man di gabinete Mike Eman ta wordo mara den e ley aki, considerablemente.

Pero talves e ehempel mas simple pa hasta e parlamentarionan di AVP compronde ta ancra den articulo 23 di e ley, den cual ta stipula cu ni den caso di calamidad e minister presidente di e pais aki no por tuma decision mesora. E mester di aprobacion di Hulanda prome. Esaki ta forma mas halto di curatela, di entrega di nos autonomia. Pasobra prome cu CAFT ta e prome minister di pais Aruba mes por a tuma decision, pero awor cu tin CAFT, ni esey Mike Eman por hasi mas.

Ami ta considera e ley di CAFT literalmente un ley di curatela. Pasobra Mike Eman y su ministernan tin un adiccion grandi di malgasta placa, locual nan propio colega minister mes a bisa, y pa motibo di e adiccion aki mester pone nan bou di curatela.

Mi ta kere cu nos pais ta pasando den momentonan hopi dificil, y na e momentonan aki nos pais mester di politiconan responsabel, y no politiconan cu ta sigi manipula cu pueblo. Ban ta honesto cu e pueblo y stop di hunga cu mente di hende. Mike Eman a sinti e rosea cayente di pueblo diahuebs ultimo, si di berdad Mike Eman kier pa bin pas na Aruba e mester stop di manipula y e mester ta honesto cu pueblo. E mester admiti cu el’a faya, y e lo hasi nos pueblo un gran favor di tuma honor na su mes y entrega su retiro”, Evelyn Wever-Croes a finalisa.

Expresionnan haci den e articulo aki no necesariamente ta refleha opinion di ArenaPoliti.co