Universidad di Aruba ta logra “Erasmus Chapter” cu ta crea extra dimension Europeo 

ORANJESTAD- Na Europahuis Prome Minister Mike Eman hunto cu dos profesor di Universidad di Aruba dr.Carol Forde y dr. Jona Israel y riba skype dos studiante di Aruba, Mynorka Daza y Grixeny (Tanisha) Ponson na Alemania y representante di Aruba na Brussel mr.drs. Cedrick Tilma, a anuncia orguyosamente cu Universidad di Aruba a logra e ‘Erasmus Chapter’ (‘Erasmus’ (European Community Action Scheme for the Mobility of UniversityStudents).Esaki ta un programa Europeo cu tin como meta pa mehora calidad di enseñansa na universidadnan y pa fortifica nan dimension Europeo. E programa ta subsidia intercambio di studiante y docentenan na institutonan di enseñansa superior na Union Europeo.

Desiderius Erasmus
E programa ta carga nomber di e Hulandes Desiderius ERASMUS, un di e filofosonan y Humanista mas grandi cu Europa a produci. Erasmus a nace na Rotterdam na aña 1466 y a studia na Paris y Leuven. Su pensamentonan tabatin influencia grandi riba e direccion di historia na Europa durante siglo 15 y 16. Influencia di Erasmus ta sigui te den siglo 21 y awor na Aruba tambe atrabes di e programa cu ta carga su nomber.

UNIVERSIDAD DI ARUBA NO POR A HAYA ACCESO NA ERASMUS

E logro ta grandi pasobra cu desde añanan 90 Aruba tabatin caba derecho pa haci uzo di e programa ‘Erasmus’ pero pa motibo di un sistema di certificacion, e “Erasmus Chapter’, solamente universidadnan di e parti Hulandes di Reino tabata logra califica.  E ‘Erasmus Chapter’ tabata wordo duna solamente na Universidadnan cu ta riba un lista nacional di acreditacion di cada pais miembro di Union Europeo. CROHO (Centraal Register Opleidingen Hoger Onderwijs) ta nomber Hulandes di e lista aki cu ta reglamenta pa ley Hulandes. Aruba tin su propio ley di enseñansa superior y esaki no ta cay bou di ley Hulandes. Pa e motibo aki institutonan superior di educacion di Aruba no tabata logra subi e lista di CROHO.

Na 2011 a purba kibra e impasse aki pero no a logra. Na 2012 e instancia cu ta maneha e programa di Erasmus Universiteit (NUFFIC) a wordo acerca pa trata na trece e programa Erasmus pa Aruba y kibra e impasse.

SOLUCION

A traha riba un solucion durante un reunion den luna di juli 2013 entre representantenan di Aruba ( Glenn Thode y Cedrick Tilma) y Ministerio di Enseñansa Hulandes (Aldrick in ‘t Hout di OC&W). A acorda cu si Aruba logra un evaluacion positivo di Nederlands Vlaams Accreditatie Organisatie (NVAO) cu OC&W ta reconoce cu Universidad di Aruba ta cumpli cu e rekisitonan pa por bay riba e lista di CROHO y asina ta duna señal positivo na Brussel cu Aruba ta cumpli cu e normanan Hulandes.

Na mei 2014 Universidad di Aruba a logra haya su acreditacion di NVAO y di biaha despues a solicita pa e Erasmus Charter. A logra e Charter y esaki a drenta na vigor dia 1 di januari 2015. Asina a cuminsa e proceso pa aplica pa becanan di Erasmus. Tur tres proposicion cu a wordo treci dilanti a wordo logra.

Becanan pa studiante y docentenan pa studia/intercambia den UE. Becanan pa studiante studia/intercambia na Merca y na di tres luga financia cursonan di ley Europeo cu por wordo duna na UA.

Cu e Erasmus Charter den man y un gran cantidad di beca, UA awor ta riba nivel di Universidadnan Europeo. Ta habri caminda pa aumenta un red cu Universidadnan na Europa cu kier intercambia cu Aruba y cu ta internacionalisa UA mas ainda. Na september 2015 e prome dos studiante Mynorka Daza y Grixeny (Tanisha) Ponson a bay Alemania pa studia 1 semester na Deggendorf Institute of Technology. Acceso di Universidad di Aruba na e programa di Erasmus ta un ehempel clave cu e dimension Europeo di Aruba y e maneho positivo cu Reino y Europa ta trece cu ne oportunidadnan grandi.  

Expresionnan haci den e articulo aki no necesariamente ta refleha opinion di ArenaPoliti.co