Cruise Symposium Aruba 2015 ta diahuebs awor  

Minister Otmar Oduber a habri siman topando cu prensa riba diferente topico. E mandatario a probecha e rueda di prensa pa comparti e grato noticia cu den e di dos edicion di Cruise Symposium Aruba 2015, diahuebs awor, lo tin como orador principal e Presidente di Asociacion di Relacionnan Gubernamental Latino Americano y Caribe pa Royal Caribbean Cruises Ltd., Sr. Federico González-Denton. Esaki ta despues cu aña pasa oficina di turismo pa prome biaha a organisa e Simposio Crucero aki cu a resulta di ta un exito.

Cruise Symposium Aruba 2015 ta duna tambe e inicio na e temporada halto di turismo crucero cual ta core te cu mei 2016. Aunke mester bisa si cu desde 2013 e maneho ta dirigi cu Aruba no conoce "off season" mas. Na 2013 turismo crucero a conoce un 100 mil pasahero adicional pa e barconan crucero netamente den e temporada di mei pa october cu ta conoci pa ricibi un cantidad minimo di barco crucero. Minister Oduber ta comenta: "Pa e ultimo añanan por mira actividadnan continuo pa locual ta trata nos waf, unda practicamente henter aña ta mira cu tin trabou pa e tour operators y tur esunnan cu ta haci negoshi den e area aki. E impacto cu esaki tin desde 2013 ta notabel, asina mes cu e dos añanan despues a conoce un disminucion minimo averahe pa aña cu ta mantene nos margen mas halto compara cu e cifranan anterior." Pa e periodo di 2016 e mandatario ta menciona cu ta spera un record nobo pa Aruba pa locual ta trata e cifranan di turismo crucero. Sr. Oduber ta bisa: "Aruba pa prome biaha ta bay conoce den 2016, un total di 700 mil pasahero cu lo yega via barconan crucero. E ta un suma bastante significativo mirando e consecuencianan pa economia di nos isla, pa tur esunnan cu ta haci negoshi den nos centro di ciudad y tur e posibilidadnan pa logra atrae e posibel futuro bishitante cu un estadia mas largo riba nos isla."

Na inicio di 2016 Aruba ta aumenta e cobransa pa entrada pa cada pasahero abordo di e barconan di un 3.50 dollar pa 8.50 dollar. Minister Oduber: "E ta un decision cu a bin despues cu a negosha 2 aña pasa caba cu diferente companianan di barconan crucero. Por mira cu a pesar cu e prijs ta subi, e cantidad di bishitante pa barconan crucero no tin un efecto negativo, danki na e bon relacion cu tin cu e diferente lineanan di crucero." Un bon relacion danki na cumplimento di palabracionnan manera ta e desaroyonan positivo cu tin riba nos isla y inversion continuo na mehoracion di Producto Aruba. "Mehoracion di e Producto cu nos ta ofrece na e lineanan crucero ta importante y cu a keda comproba mirando e aumento den cantidad di bishitante cu a tuma luga na 2013 despues di e revitalisacion di nos centro di ciudad,  pero cu ta continua awor den e proximo lunanan nos dilanti cu un Welcome Plaza y hunto cu ne reorganisacion di tur e operacionnan cu tin riba nos waf cu ta e diferente servicionan brinda na nos bishitantenan. Aruba un biaha mas ta pone su mes un stap mas dilanti como destinacion turistico y como un di e destinacionnan preferi den Caribe."

Diahuebs awor lo bay amplia riba e topico aki durante e simposio. E ta un oportunidad pa tur e stakeholders y partnernan por haya un miho bista di e desaroyonan. Minister Oduber ta comenta cu lo bay comparti informacion di cantidad di barconan, e cantidad di pasahero cu ta bay crece y tambe e posibilidadnan cu tin pa tur esunnan cu ta traha den e industria aki y kico esaki lo nifica pa economia di Aruba. E meta di e Cruise Symposium Aruba 2015 ta pa crea negoshinan dentro di e industria aki cu ta riba un caminda asina positivo y creciendo.

Expresionnan haci den e articulo aki no necesariamente ta refleha opinion di ArenaPoliti.co