Parlamentario mr. Juan Ady Thijsen (MEP): Kitando 1613x gobierno ta pone mas polvo riba e situacion social explosivo
Apesar cu Aruba ya tin bastante problema entre otro un situacion social hopi tenso awor gobierno ta planea pa kita tur seguridad cu e clase trahador tini. Segun parlamentario mr. Juan Ady Thijsen gobierno tin intencion di tuma varios medida contra e clase trahador y na favor di e donjonan di trabao. Un di e medidanan aki ta e eliminacion di articulo 1613x cual ta un cambio laboral cu partido MEP na 1992 a introduci hustamente pa duna e trahador mas seguridad di trabao. Esey a tuma lugar den un epoca cu tabata tin hopi mal uso di e contractonan di corto duracion. Aruba ta e unico pais den reino hulandes cu conoce e proteccion aki. Basicamente e ley ta bisa cu tur trabao na Aruba cu karakter permanente mester ta pa medio di un contracto laboral pa tempo indifini. E ley ta duna specificamente e situacion unda por desvia pero esaki mester bai por escrito. Asina segun parlamentario mr. Juan Ady Thijsen e clase trahador a disfruta yaba pa 23 anja den un seguridad laboral pa porehemplo haya prestamo na banco y kitando 1613x gobierno ta pone mas polvo riba e situacion social explosivo. Pa esey mes na e momento dificil cu Aruba ta den ta importante pa trece union sindical bek den nos pais. Parlamentario mr. Juan Ady Thijsen ta haci e apelacion riba sindicatonan pa pone diferencia un banda y pa hunto nos traha riba pa salba e clase trahador y e pueblo for di gara di hendenan cu no sa goberna na defensa di esnan cu mas ta sufri den nos comunidad.
Expresionnan haci den e articulo aki no necesariamente ta refleha opinion di ArenaPoliti.co