Aunke cu e decision di elimina articulo 1613x a wordo poni "on hold" ta relevante pa pueblo sa cu no ta for di awor Minister di labor tawata tin esaki den mente sino for di tempo cu e la cuminsa papia y propaganda flexibilisacion di leynan laboral.
Cu e la dicidi pa no continua cu eliminacion ta un alivio temporal pa e futuro trahador pero ta nifica tambe cu e clase trahador mester keda alerta. Pasobra den principio esaki tawata e promer intento di un pakete di medida contra e clase trahador cual ta inclui entre otro eliminacion di articulo 1613x, cambio den ley di retiro y cambio den otorgamente di permiso pa trabou. Pero ta importante pa remarca cu no ta zomaar e minister a dicidi pone eliminacion di e articulo aki on hold. Ta rosea cayente di pueblo na e garganta di Minister di labor a pone cu e no a durf di sigui hunga cune! Tampoco no ta fraccion di AVP a para cos. Ta letterlijk un avalancha di critica y argumentonan valido di parti gremionan sindical y tur politico di oposicion cu a vocifera cu si bo elimina articulo 1613x bo lo crea free for all y e futuro trahador lo a bira catibo y yoyo di e dunador di trabou a hunga un rol. E Minister aki a realisa cu su intencion (despues di a propagande) ta uno cu si e la tuma lo tawata tin un consecuencia negativo pa su carera y ta pesei e la "parkeer" e decision.

Un di e argumentonan cu a wordo treci padilanti door di gremio comercial y Minister Paul Croes pa substancia e idea di elimina articulo 1613x ta cu e lo beneficia entre otro 50 plussers y esnan cu ta cobra un bijstand. Dus cu otro palabra hasi e persona independiente di e placa cu ta cobra for di gobierno pa mantene su mes. Pero den mesun momento cu segun nan ta brindando un oportunidad e grupo aki ta wordo limita. E limitacion tin di haber cu e chens pa di berdad start un bida sostenibel cu un salario.

E maneho cu Minister Paul Croes ta hibando na e momentonan aki ta uno cu basicamente ta scrutina tur hende pa haya evalua si ta kita nan bijstand pa despues bisa pueblo "wak ma cumpli" y ma spaar gobierno placa. Enbes cu a bin cu un plan y crea un desaroyo sostenibel pa e personanan por progresa nan ta wordo confronta cu lo no tin bijstand mas pasobra nan a haya trabou pa 8 luna. Ora cu resulta cu e personan aki haya un "skop" di e dunador di trabou kiko lo ta e plan e ora ey? Pesei e intencion di Minister Paul Croes di elimina articulo 1613x ta uno hopi macabro pasobra e persona ta core riesgo atrobe di keda sin entrada pa cria su mes of famia. Ora cu esaki sosode e lo bai cobra bijstand atrobe toch? Lo ta bon pa e minister splica pueblo si esaki ta efectivo pa gastonan di gobierno! Dicon por ehempel bo no a start un plan pa laga esnan entre 45-55 bini na remarca pa un trabou stabiel? Pakiko hasi interesante di duna nan un "crenchi di bolo" cu un trabou di 8 luna cu despues facilmente por wordo kita bek for di nan? Acaso bo no ta na altura cu e grupo entre 45-55 sin trabou ta uno grandi? Promer cubo core tira cifra den laira bai bishita pueblo, bai scucha su dolor. Acaso bo no a pensa cu pa e personanan aki e caminda pa yega nan edad di pensioen ainda ta uno largo?

Si di berdad Minister kier haya mas hende den mercado laboral y logra hasi e personanan aki independiente di por ehempel bijstand e lo mester concentra riba un plan basa riba termino largo. Pasobra pa un persona core riesgo cu despues di renoba contract pa 3x (cual ta un periodo largo) y toch e no wordo tuma ta un soketada contra e trahador! Ta di lamenta cu Minister di labor no ta enfokando riba un desaroyo laboral sostenibel pero solamente riba un desaroyo limita! Pesei nos di oposicion lo keda monitorea esaki y ta pidi pa pueblo keda alerta pa e intencionan cu tin pa cambionan den ley laboral door di Minister di labor.

Expresionnan haci den e articulo aki no necesariamente ta refleha opinion di ArenaPoliti.co