Na momento cu Aruba conoce un bon aña den turismo niun hende no kier mira un caida den e cifranan. Esaki ta netamente entre e discusion recien na e reunion cu comision fiho di Turismo di Parlamento na ATA diaranson atardi. Comision Fiho di Parlamento a reuni cu Oficina di Turismo y Minister Oduber pa por haya un miho bista riba e maneho di ATA y kico por spera e aña nos dilanti. ATA a comparti e cifranan di 2015 y a comparti e grato noticia di e cifranan positivo cu a proyecta pa 2016. Asina mes tin algun miembro di Parlamento cu a demostra nan preocupacion, cu pa 2015 Aruba a conoce un caida den e cifranan Turistico.
Minister Otmar Oduber ta comenta: "Tin un percepcion cu mester keda haya un aña riba otro cu un por ehempel 10%, cu dia nos yega 8% e ta nifica un caida. Tanten cu tin un crecemento e ta un crecemento acumulativo. E ta crece riba locual a crece e aña anterior y esaki ta e detayenan cu mester sali pa por compronde e cifranan di nos turismo un tiki miho."
Un otro ehempel ta e Revpar cu enberdad a conoce un disminucion den e ultimo 2 lunanan, pero ainda por ripara cu den e lunanan nos dilanti e ta bay subi cu 5%. Sr. Oduber ta sigui splica: "E 5% aki ta riba un crecemento di aña pasa di 18% y e aña prome cu esey cu tambe tabata tin un crecemento cu entotal por bisa cu Revpar a conoce un crecemento di casi 40% den e ultimo añanan compara di locual e tabata anteriormente."
E mandatario ta enfatisa cu na e momentonan aki tur e cifranan di turismo ta conociendo un aumento cu excepcion di e cantidad di bishitantenan di barconan crucero cu nos a conoce un caida pero esaki compara cu e record cu Aruba a conoce na 2013. Na aña 2013 nos a conoce un crecemento di 100 mil bishitante adicional di barconan crucero y ya caba ta premira cu pa 2016 Aruba lo kibra su mesun record surpasando e cantidad aki. " Tur indicador pa locual ta grado di ocupacion, Revpar, ADR prijs pa camber tur den averahe ta subi. E cantidad di placa cu ta circula segun Banco Central tambe a subi. Pesey ta importante ora manda e informacionnan den comunidad, mester corda cu confiansa di inversionista, confiansa di e persona cu kier amplia su negoshi of habri un negoshi nobo ta hopi importante. Pesey mester maneha e cifranan corecto."
E mandatario ta sigui comenta cu Aruba a demostra cu a pesar di no tin un refineria asina mes a conoce un crecemento economico, y si tin un crecemento economico ta nifica cu bo unico pilar economico cual ta Turismo, ta bayendo bon. Aruba ta cera aña 2015 positivamente y 2016 sigur lo bira un miho aña pa Turismo di nos isla.

Expresionnan haci den e articulo aki no necesariamente ta refleha opinion di ArenaPoliti.co