Na inauguracion di trabounan di construccion di brug nobo na Spaans Lagoen Minister Sevinger a reitera 

ORANJESTAD – Durante ceremonia di desvelo di borchi pa construccion di e brug nobo riba Spaans Lagoen, Minister di Infrastructura Benny Sevinger a enfatisa loke e proyecto aki ta representa pa pueblonan pariba di brug den termino di desaroyo economico, pero mas importante ainda, desaroyo social.

“Si di berdad nos kier desaroyo pa San Niciolas, aki ta caminda cu e desaroyo ey ta bay haya man y pia. E caminda aki ta bay contribui grandemente na desaroyo pariba di brug,” Minister Sevinger a bisa esnan presente.

Riba e hecho cu e proyecto aki tabata un punto di discusion pa añanan largo, e titular di Infrastructura ademas di Desaroyo Teritorial y Integracion, a comenta cu ta masha facil pa compronde si bo wak den e contexto aki: “Ora cu un hende ta biba na San Nicolas y e tin cu traha na Oranjestad of hotel y e tin cu lanta 4or di marduga pa e traha su pan, hiba su yiunan y laga nan eynan prome cu scol habri pa e yega pia di trabou 7or y bo bis’e cu e caminda aki ta bay percura pa e yega na su trabou safe paso autonan no por pasa otro mas y cu e ta bay yega su trabou por ta, te hasta 20 minuut mas trempan y yega cas 20 minuut mas trempan, esey ta un tempo cu bo no por pone un prijs riba dje pero kere mi cu e ta bay nifica hopi pa e hendenan di pariba di brug.”

E mandatario ta sigur cu un bes e proyecto keda cla, ta bay mira su frutanan pa cual el a pidi un fuerte aplauso pa Prome Minister Eman y su vision cu a percura pa Green Corridor ta keda realisa bou di e gobernacion aki. Adicionalmente, el a felicita tur esnan envolvi paso cada persona su aporte ta muestra cu nos kier un miho futuro pa Aruba.

Minister Sevinger a reafirma su confianza den Grupo Odinsa cu ta bay comberti e proyecto aki den un bon trabou y cu nos tur ta orguyoso di dje. “Laga  nos hunto traha hunto. Unda cu por tin reto, na mesa nos ta resolve esaki. Con cu bay bin nos ta den e barco aki hunto y hunto nos ta yega na final den nomber di pueblo y pa e pueblo di Aruba,” asina e mandatario a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co